Rilo palei ngak di Tien Giang hu patagok hedei di jit ruak covid 19

Tui Chi cục patagok palei pala tỉnh Tiền Giang, kayua kan kandah di jit Covid-19 nan ye tuk vak tapa , jiak abih 13 palei ngak di tỉnh Tiền Giang brei padeih atau ngak bruk meteh dhi, abih di nyu nan lac dalam tuk vak peih bruk paatah di gauk, piah khik kajap bruk pacang caga jit.

Di palei menyim ciu  Long Định (ấp Mới, xã Long Định, huyện Châu Thành) hu  34 boh sang menyim ciu, dalam tuk siam mekre, tuk oh ka hu jit  COVID-19 palei ngak brei hu 68 - 75 tấn nguyên liệu/dalam sa bilan piah ngak ciu. Min, tuk vak tapa, palei ngak yau padeih ngak kayua oh hu pandap piah ngak.

Min, dom harei ni, mai tal Tiền Giang, meda mboh bruk ngak di rilo palei ngak daok chreih chrai veik. Lagaih haong raidiuk siam mekre bahrau, gam pacang caga jit  COVID-19, gam jhul pakhang bruk ngak mbang palei salih, meng di bilan  11 saka ia bilan, palei menyim ciu Long Định daok jar var ngak ciu piah pablei tết. Dom sang ngak ciu brei thau, dom ciu bingu hu urang kakei blei thun ni trun dut song yaok thun, min, tui urang hu rilo thun ngak bruk, dom harei tết tuia mai blei pandap meda hu rilo jang. Ong Vũ Văn Tiến, urang ngak bruk cih bingu ciu lavik thun di palei ngak brei thau, Urak ni, sang ong  taduan cih bingu  ka 10.000 blah ciu. Cong khin lac dom harei tal meda hu rilo harak pambuak bruk blei ciu rilo jang piah palei ngak samar pasiam veik bruk ngak.

Yaom lac takik rilo njauk kan kandah di jit ruak, min dom pandap pandar harei Tết jeng dok hu drak pasa pablei. Meng kreih bilan  10 saka ia bilan, dom boh sang di palei ngak har tapei racam Hậu Thành (huyện Cái Bè) jar var ngak har piah samu pablei ka tuai. Di palei ngak pacuc - hủ tiếu di ban. Mỹ Tho, dom sang ngak jeng dok jar var caga pandap piah ngak pablei ka drak pasatết. Tui kuhria, palei meda ngak pablei ka drak pasa  Tết Nguyên đán labaih 450 tấn pacuc.

Ong Trần Văn Thuê, phaok akaok  UBND xã Long Định brei thau, piah dong ka palei ngak patagok khang kajap, dalam tuk vak tal, Chi cục patagok palei pala  tỉnh Tiền Giang hu pambuak bruk haong jabat pambuak tal bruk nan, pasang iek, dong tacei jalan ngak tabiak janih pandap thủ công mỹ nghệ; pato pakai bruk ngak ka urang ngak, pato pasram ilamu khik ramik  doanh nghiệp song sarak pagam tal palei ngak, dong ka dom labik ngak hu thau ka drak pasa, pambuak bruk pablei tabiak, xúc tiến thương mại tapa dom nyaom pasa. Gam haong nan, jhul pakhang bruk pandar công nghệ piah peih labik pablei pandap online angaok mạng xã hội song yaih khan pandap angaok sàn giao dịch thương mại điện tử.

Sa bilan xuân tra jiak tal, rahra di dom palei ngak  di Tiền Giang dok sami samar ngak tabiak  piah hu ginup pandap pabak ka drak pasa  Tết. Oh lac rik dong patagok jien mek tame ka urang ngak, bo dom pandap siam gheih, biak karei mai meng dom palei ngak dok ba mai bui sambai, trei si  ka yaok menuac urang, yaok boh sang dalam tuk thun bahrau tal mai./.

Urang lang: Hanipha- 17/1

 

 

 

 

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân