Harei 16-1, Tỉnh ủy - HĐND-UBND saong Ủy ban Mặt trận Negar Việt Nam tỉnh Bến Tre peih bruk pahadar 62 thun Harei Bến Tre Đồng Khởi (17-1-1960 -17-1-2022). Peih tabiak meng dom xã: Định Thuỷ, Phước Hiệp, Bình Khánh, di huyện Mỏ Cày Nam, hadei di nan Danak dak patuh tabiak di grauk labik dalam tỉnh Bến Tre saong samar pambak tabiak dom tinh gah maraong negar. Danak dak Đồng khởi hu ngak salih karei bruk quân sự, ba cách mạng gah maraong meng khik ramik kapul tapa mesuh metak, ngak jeng bruk salih bahrau khang di cách mạng gah meraong, Taphia dom bruk ngak hu makna praong yau ye alin hadaih ka bhap bini kan kathaot, sang hu prein haong kanja, peih pakah dom danak dak jalan mbak, sang bac saong mbaoh tangin haong dom sang buh jien tame ngak piah patagok kinh tế- xã hội, tapa nan, UBND tỉnh Bến Tre alin angan “Rahra Đồng Khởi angan je” saong “rahra Đồng Khởi danh dự” mbang ka 2 - thun 2022 ka 11urang hu bruk ngak naih ghieh rik tame bruk dak padang saong cak rok patagok puk palei.  

Mai rivang song tadhau yhut tết di tỉnh Bạc Liêu tuk beir harei kabroi  (16/1), Phó Thủ tướng rajaei  Lê Minh Khái hu jao ka Bạc Liêu 750 pok pandap  Tết, yaok pok yaom  1,2 triệu đồng piah alin brei ka dom boh sang dalam sarak karja , urang kan kandah, urang ngak kan kathaot kayua jit  Covid- 19... Gam haong nan,  Phó Thủ Tướng Lê Minh Khái jeng tong yaom glong Bạc Liêu peih ngak dom sarak di rajaei, pagap yau peih ngak siam sarak 68 song 116 di rajaei , meng nan rik dong ka bruk  an sinh xã hội peih ngak njauk tui jalan  “Oh hu urang halei njauk klaak veik di gah likuk” dalam mbang jit prong  Covid-19 meng bloh.

  Di sang ilamo dam dara TPHCM daok rahh tabiak Harei pataom Tết Việt thun 2022 ngan haong dom bruk ngak yau ye "jalan bingu mai" saong "Phố ông đồ" dalam labik ndung mbak ilamo Tết meng kan. Ini lac sa bruk yaok thun bhian hu peih tabiak dalam tuk Tết Nguyên đán piah rik tame daong khik caga, patagok dom yaom glaong ilamo meng kan di bangsa saong yaih khan thaot bingu di labik tal TPHCM “Chreih chrai – Bui sambai - Hadah hadai - Sambo màu” tal dom ayut sahabat di dunya. Harei pataom jeng piah pahadar dom rik daong di y bác sĩ, urang ngak gah y tế, dom gru jru… labik dang akaok pacang caga jit COVID-19 dalam tukvak tapa.

Hội đồng điều phối bhum taneran krong  Cửu Long bahrau tabiak sarak ka 5 ka bruk rami ramik bhum saong pok jien mesraiy dong ka bhum taneran krong  Cửu Long. Dalam nan ba tabiak bruk lac tal thun  2030, patagok bhum taneran krong  Cửu Long jeng pasak  kinh tế ngak nong khang kajap, sami samar song kein laba glong di taneh ia, bhum taneh song dunya . Gam haong nan, brei patagok dahlau jalan mbak nao mai, hu makna prong pakat negar, bhum palei , pambuak dom tỉnh,  dalam nan hu bruk jalan mbak nao mai, năng lượng, ia hacih saat, pasak prong ka gah ngak nong, pato pakai, y tế, krong ribong, pacang caga bala meng langik tasik , lagaih haong  biến đổi khí hậu.

Gam gam dalam 2 adit tapa, yaok harei Bình Dương tok hu oh ka tal 100 urang njom COVID-19, dalam nan hu harei hu 30 urang njom. Gam haong bruk dom urang njom ruak trun, dom urang thit ruak jeng daok di tanut glaong, lac labaih 1.000 urang yaok harei. Bình Dương urak ini daok labaih 29.000 urang njom COVID-19, abih di nyu nan lac taong ruak di sang saong daok labaih 120 F0 njauk suak yava meng oxy. Dom urang njom ruak COVID-19 di Bình Dương metai dalam dom harei jaik di ini jeng trun bier di abih kuhria meng tuk jit mbang ka 4 tamuh tabiak. Urak ini di pak ini hu 68 xã, phường, ban sit daok di pakat jit hijao saong 23 xã, phường, ban sit daok di pakat jit sambo kanjik.      

Quốc hội Prang brei tapa dom jalan ngak bahrau di abih piah pacang caga jit  COVID-19, dalam nan hu  sarak  ka  “passport vắc-xin”.  Hukum bahrau ni  ba tabiak bruk lac urang brei hu harak klauk jru meng hu mbaok tame dom labik công cộng. Urak ni, di Prang, dom urang oh ka klauk jru jeng meda nao tal labik công cộng meyah hu harak chứng nhận dut iek  COVID-19 âm tính. Sarak ka “passport vắc-xin” hu rajaei Prang  batabiak meng   puac bilan  12/2021 dalam tuk urang njom  Covid-19 gam gam tagok khang yaok harei hu labaih 300 ribau urang njom bahrau.

Trung Quốc jaik di ini hu 2 urang metai dalam 5 urang njauk cúm manuk ada H5N6. Gah Y tế dunya (WHO) hu jak ba “ngak bruk samar drah” anak bruk bahrau ini. Dom chuyên gia huac lac  dom urang njom ruak bahrau cúm manuk ada daok tagok khang di Trung Quốc saong kakei lac chủng cúm ni meda tagok khang bruk njom mbak ngan haong manuac. Bilan 10/2021 WHO hu brei thau lac dom urang njom H5N6 jeng hu taom gaok tapak haong manuk ada, ka oh mboh urang halei njom meng ureang ini tapa urang dieh. Dom urang ngak praong gah y tế di Anh hu ba tabiak panuac kakei ngan haong bhap bini nao mai tal Trung Quốc kayua dom bruk pambuak tal cúm manuk ada.

  Dalam 2 harei puac adit, 15 song  16/1, di jabat  Đại sứ quán Việt Nam di Singapore hu rah tabiak bruk pakacah pok har  bánh chưng, pei nung  song rami ramik, parang iek  pandap panda ngan saong kadha  “Tết Việt” di mik va urang Việt Nam daok duik rai, ngak bruk song bac daa di  Singapore. Hu mbaok tame pakacah hu 11 kapul,  yaok kapul hu  2 urang,  dalam umo karei di gauk dalam bhap bini urang   Việt  daok di Singapore. Ni lac sa dalam dom bruk ngak  “Uan thun bahrau thunsak rimong ” kayua  Đại sứ quán Việt Nam, Ban Liên lạc bhap bini urang  Việt Nam song Hội sinh viên Việt Nam di Singapore pambuak bruk peih ngak piah khik ramik song patagok  ilamu  Việt Nam tuk thun bahrau mai, dong patagok talei rohim pambuak gauk dalam bhap bini urang  Việt ./.

Urang lang: H.Pha & Thu Thao – 17/1/2022

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân