Dam dara halan hatain hu mbaok di rilo labik 

Phường Ea Tam, bal sit Buôn Ma Thuột, tỉnh Đắk Lắk hu labaih 22.000 cử tri ngan haong 14 labik buh phiếu. Dalam nan, hu jaik 35% lac cử tri daok ranaih, urang mbang akaok meti nao buh phiếu. Ini jeng lac labik hu rilo sang bac Đại học, Cao đẳng hu rilo sinh viên ginup umo thun nao buh phiếu di mbang palih ruah ini. Tal harei ini, Kapul dam dara phường Ea Tam hu ngak salah blaoh dom mbang pathau khan ka Hukum palih ruah urang ka QH saong HĐ bhap bini, umo nao buh phiếu saong umo ứng cử, dom kadha oh brei tabiak ứng cử ngak urang QH saong HĐ bhap bani, jalan jak ba palaih ruah, bruk buh phiếu, tukvak buh phiếu

Ngan haong dom cử tri daok ranaih yau H’ Sinh Bkrông, sinh viên thun ka 2, Đại học Tây Nguyên, tỉnh Đắk Lắk, ini lac mbang akaok meti hu nao palih ruah nan ye H’ Sinh biak chreih chai bui sambai, cang tal harei hu pal angaok tangin blah phiếu, peih ngak quyền saong nghĩa vụ di drei. H’ Sinh khan lac:

 “Ini lac mbang akaok mereip adei nao buh phiếu, nan ye adei biak chreih chai peih ngak quyền rahra di drei. Anak tal tuk nao buh phiếu, adei palih ruah dom urang naih jioy, rik daong jhul patagok bruk ngak mbang kinh tế, xã hội di puk palei”.

Sa-ai Nguyễn Thùy Trang, Bí thư Đoàn phường Ea Tam, bal sit Buôn Ma Thuột, tỉnh Đắk Lắk brei thau: rik daong tame jak jeng di harei palih ruah 23/5 anak tal, Đoàn phường hu brei bruk ka urang đoàn dam dara di dom puk palei hu mbaok tame dalam tổ bầu cử di labik daok piah pambuak bruk haong puk palei, tổ dân phố tacei pato, pathau khan jeng yau kuhria caga pandap panda, khik kajap an ninh dalam harei palih ruah. Abih di nyu nan lac, piah ka dom urang ứng cử ranaih umo jia tame rup drei piah khan brei thau bruk ngak di drei tuk hu mbaok tame jak ba urang palih ruah, Đoàn phường hu peih tal pato pathram paglaong ilamu ndom puac anak rilo manuac ka dom ứng viên ranaih.

“ Đoàn phường jeng hu tacei pato ka dom urang ứng cử daok ranaih umo padang ngak kadha jak ba tal labik bo dom urang nan hu mbaok tame palih ruah piah ka chất lượng kadha pathau khan, jak ba mek hu jak jeng siam mekre di abih. Nan jeng brei mboh bruk ngak di dam dara dalam jak ba, dak padang phường Ea Tam saong labik drei palih ruah hu siam di abih”.

Harei palih ruah daok mai biak jaik, Tỉnh đoàn Đắk Lắk hu peih ngak rilo bruk salam uan di dom huyện, bal prong, bal si, hu mbaok di yaok ribau urang đoàn, dam dara dalam tỉnh. Tui nan, peih bruk halar hatian di dom labik palih ruah yau: hu mbaok tame daong khik kajap an ninh trật tự, khik siam mekre hacih sa-at labik peih palih ruah, bruk pacang caga jit Covid-19; peih Harei pataom cử tri ranaih; ginum biai nao mai “Cử tri ranaih haong bruk palih ruah urang ka QH mbang XV saong urang ka HĐ bhap bani dom pakat vaktu 2021-2026” …Sa-ai Phan Thị Trinh, Phaok Bí thư Tỉnh đoàn Đắk Lắk brei thau:

“Ban thường vụ tỉnh đoàn Đắk Lắk hu peih rilo bruk halar hatian di dom labik palih ruah. Dom bruk ngak ini pataom tame asal kadha pathau khan saong peih bruk ginum biai cử tri ranaih saong peih  nyaom pakacah blah phiếu trách nhiệm piah ka dom urang đoàn, dam dara thau hu quyền, trách nhiệm saong dom asal kadha ka bruk palih ruah urang ka QH mbang 15 saong HĐ bhap bani dom pakat vaktu 2021-2026. Ban thường vụ Tỉnh đoàn hu peih ngak tal dom huyện, bal prong, bal sit”.

Tapa dom bruk pathau khan saong halar hatian, hu daong ka urang đoàn, dam dara saong yaok rahra di tỉnh Đắk Lắk thau ka quyền lợi, nghĩa vụ saong bruk ngak di drei dalam dak padang taneh aia hacih sa-at, khang kajap, kein laba, siam lagaih; halar hatian hu mbaok tame, abih hatai dalam bruk ngak, rik daong tame jak jeng di bruk palih ruah./.

Urang lang: Jasi -14/5

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân