Tal bilan ia ndik urang di grauk labik mai rivang main 

2 thun ni mai, oh hu ia meng gah angaok tuh mai, ia oh dok dauk mblang hamu, ikan, hadang oh dok rilo, ong Huỳnh Văn Tùng, xã Phú Lộc, ban sit Tân Châu, tỉnh An Giang oh dok tong chap kaya ikan. Hu karja palei tacei pato song dong palagaih, ong salih tapa rong lanung dalam danao. Hadei di jiak 7 bilan, ong laba hu labaih 35 triệu đồng:

“ Jalan ngak ni rong jeng hu mbang. Thun ni jit ruak, jeng duah jien hu, nyu tani tanat jang song lagaih jang bruk drei nao tong chap ikan”.

Jeng dreih yau ong Tùng, min saai Trần Vũ Phong, xã Phú Lộc palih ruah bruk rong pabe piah patagok kinh tế boh sang. Saai pambak tame dom mblang hamu oh hu ia, hareik tamuh rilo, lac pandap mbang siam ka pabe. Urak ni, var pabe di saai hu  70 drei, duah hu yaok thun jiak 100 triệu đồng. Ni lac sa dalam yaok pluh bruk rong glang di ban sit Tân Châu, hu karja pak ni dong brei mesraiy phun jien. Ong Phạm Văn Hải, Phaok akaok jabat kinh tế ban sit Tân Châu, tỉnh An Giang lac:

“kayua ia ndik sit, karja sangka tal dom sang kan kathaot, ngak mbang duah jien meng vah ikan, caik halam. Bruk salih meng tong chap kaya ikan di langik tasik, tapa bruk rong glang dong ka mik va hu bruk ngak, duah hu jien tani tanat jang”.

Jeng lac labik gah angaok di An Giang, dom thun ni mai, di huyện An Phú ia bhain mai suai song sit nan ye kaya ikan  oh dok rilo. Karja hu pambuak bruk song dom jabat pagam tal ba tabiak rilo jalan ngak mbang duah jien ka urang nong palei pala yau: rong hadang ginrong hajao angaok taneh padai, rong ikan ia taba dalam danao … Gam haong nan, pachreih ba, palagaih ka urang nong salih taneh ngak padai takik kein laba tapa ngak nong pandar công nghệ glong, ba mai kein laba kinh tế, yau: pala njam thủy canh, rong lanung dalam danao, pala bimao pon, pala dưa lưới dalam sang camin… Ong Trần Hòa Hợp, Akaok UB bhap bini  huyện An Phú, tỉnh An Giang brei thau:

“Anak tal, piah patagok kinh tế ngak nong, kol dahlak pataom dom pren khang tame padang ngak hạ tầng, kuac raok krong ribong, ngak jalan tame mblang hamu palagaih ka bruk ngak nong patagok. Abih di nyu lac pambuak song dom  doanh nghiệp, urang blei kaya nong..

Dalam tuk ia ndik dak harei dak sit, rilo bruk ngak mbang gaok kan kandah, tavak tavaiy. Kayua oh lac urang halei jeng ginup jien padai piah salih; bruk ngak mbang dok sit sot, năng suất, chất lượng oh ka glong. Kayua yau nan ye, tui dom urang ilamu , gah chức năng song puk palei brei tong yaom bruk lagaih di dom jalan ngak piah roh duah, pasang iek, panduan salih ka nyu lagaih. Langiu di nan, brei padang jalan ngak ka nyu lagaih, dong ka urang nong pandar ilamu kỹ thuật, oh lac pagam pambak tame langik tasik. Piah ka dom bruk ngak mbang duah jien hu kein laba jang, TS Trần Hữu Hiệp, giảng viên sang bac Đại học FPT ndom lac.

Kol drei njauk rami ramik ka nyu lagaih song yaok bhum, piah paglong yaom. Urang nong bac samar ka  ilamu  kỹ thuật ye siam, min bruk oh ka lagaih di urang nong lac drak pasa, ngak tabiak oh pablei ka urang halei, nan ye njauk tacei tabiak cambaih laih, kayua ilamu di urang nong saoh jeng biak kan”.

Dom bruk ngak mbang duah jien lagaih song biến đổi khí hậu, tuk bilan ia oh mai, urak ni rilo meng lac pandar hu jak jeng ka boh sang  ngak mbang sit sot. Kayua yau nan ye, brei hu dom jalan ngak siam lagaih jang, urang nong brei hu dong phun jien, ilamu, abih di nyu nan brei hu bruk pambuak gauk dalam dom HTX, dom doanh nghiệp piah patrun yaom phun song paglong siam mekre pandap panda./.

Urang lang: Hanipha- 14/10

 

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân