VN taduan hu vacxin caga Covid 19 hu klauk ka dom urang ngak gah y te 

“Dom taneh ia daok jaik taphia drei daok biak srau kadau haong jit ruak, kol drei njauk patagok bruk pacang caga Covid-19 yaom lac oh hu urang njom dalam bhap bini dalam 2 bilan jaik I ni”. Nan lac panuac kakei di Akaok UB bhap bini ban raya HCM Nguyễn Thành Phong dalam mbang nyaom di mBan tacei jalan pacang caga Covid-19 ah tabiak harei 12/4. Di mbang nyaom, Yam ndok Sở Y tế Nguyễn Tấn Bỉnh brei thau, dalam adit meng harei 12/4 – 16/4/2021, Pasak pasang iek ruak kik TPHCM meda taduan 1.600 mbang vắc-xin  pacang Covid-19 meng Gah klauk caga VNVC piah peih bruk klauk ka urang ngak dalam dom hotel peih bruk brei daok karei. TPHCM jeng daok caga taduan vắc-xin mbang ka 2 lac labaih 56.000 mbang, meda peih bruk klauk chip hadei di tuk taduan, piah ngak hu bruk klauk abih ka dom urang njuak klauk dahlau di harei 15/5..

Harei ini urang Cam Islam daok yam tame harei camereip di bilan eik Ramadan – thun 1442 saka Islam. Dahlau di nan, Thành ủy – HĐND – UBND – Ủy ban MTTQ Việt Nam ban Thủ Đức kayua ong Nguyễn Phước Hưng,UV mban CH Đảng bộ TPHCM, Phó Bí thư Thường trực Thành ủy Thủ Đức, akaok HĐND ban Thủ Đức pan akaok hu nao ravang, alin hadiah pandap saong tadhau ayuh Masjid Muwahidin uan bilan Ramadan. Tui nan, mBan jak ba, khik ramik kadung jien brei ka urang kan kathaot ban Thủ Đức hu alin hadiah pandap brei ka dom sang Cam kan kandah.

Biar harei kabroi (12/4), Pasak pambuak bruk duah urang gaok bala jalan tasik Việt Nam, Cục pajeng ba jalan tasik Việt Nam brei thau, daong hu ka 6 urang angaok gilai taong ikan kram angaok tasik Vũng Tàu. Dahlau di nan, tuk mon 8, Pasak pambuak bruk duah urang gaok bala jalan tasik Việt Nam taduan hu panuac likau daong chip meng ong Phan Dựng- thuyền trưởng kapal ikan BV 94339 TS kayua kapal daok njauk ia tame angaok tasik atah di pabah tasik Vũng Tàu jaik 60 hải lý. 6 urang angaok kapal njauk  tôn tame kaok kapal ndong tagol angaok ia. Hadei di jaik 5 mon samar nduac tabiak, kapal SAR 413 hu nao tal labik saong ba abih 6 urang angaok kapal tagok kapl nao daong. Hadei di tuk hu iek glang, 6 urang nan hu prein yava tani tanat veik.

Brei panuac tamat mbang nyaom ka 5 di Hội đồng bầu cử pakat negar hu peih tabiak di biar harei 12-4, ong Vương Đình Huệ - akaok QH, akaok HĐ bầu cử pakat negar, taong yaom glaong bruk ngak di Hội đồng bầu cử pakat negar meng mbang nyaom ka 4 tal urak ini. Ndom ka bruk anak tal, ong Vương Đình Huệ khan lac Hội đồng bầu cử pakat negar brei khik kajap dom siam mekre di nyaom roya Đảng dom pakat, nyom roya Đảng pakat negar mbang ka XIII hu pambak praong piah peih ngak hu siam harei bầu cử (tui kuhria lac harei 23-5).Dalam nan khik kajap bruk sron mbon, salamat, patak pataom, njauk adat hukum, pilih ruah hu dom menuac siam hatung hatai, hu ilamu, bac da-a glaong tame dalam Quốc hội saong HĐND dom pakat, oh pilih ruah dom menuac hu hatung hatai oh siam, pacang veik Đảng, Karja

Piah pacang caga pandiak bhang, ia njom mbak, tỉnh Bến Tre samar brei ngak dom danak dak pacang ia mbak, khik ia taba, peih bruk pathau khan, jak ba bhap bini khik ia hajan, ia taba. Tal urak ini, dom ribaong Bắc Bến Tre vaktu ka 1 hu ngak blaoh ba tame pandar 29 cống hở, 16 cống hộp; haong dom labik ar pacang tapen kraong Tiền, kraong Hàm Luông labik dom huyện Châu Thành, Giồng Trôm, Bình Đại haong ban sit Bến Tre. Hu thau, dom thun tapa, tỉnh hu buh jien padang ngak dom danak dak praong, ngan saong 194.800 ha taneh hu khik caga anak bruk ia mbak njom tame.

Tui pasak pasang iek song pacang caga jit ruak châu Phi, dom negar kathaot di châu Phi dok kadun likuk dalam bruk pakacah gauk klauk jru di dunya song bahrau hu oh ka tal 13 triệu mbang vắcxin hu klauk di châu lục 1,3 tỷ menuac urang. Tổng Giám đốc Gah pablei salih dunya  Okonjo-Iweala ndom lac, oh hu gah đạo đức jang yau ba tal kanyah jhak tuk bo bhrau hu 1,1% rahra di châu Phi hu klauk  vắcxin dalam tuk bruk ini di Bắc Mỹ lac labaih  40%.  Châu Phi daok pagam pambak tame bruk pabak meng negar langui dalam bruk blei jru, vắcxin jang yau pandap y tế. Dom urang ilamu ndom lac châu Phi urak ni blei tal 99% vắcxin min tal thun 2040 njauk trun dok  40%

Dalam tuk bang Tây Nam Maharashtra daok lac bhum jit Covid-19 praong abih di Ấn Độ, karja bang ini hu brei padang chip 3 sang iek ruak dã chiến di ban Mumbai – pasak di mbang jeng lac pasak jien padai di Ấn Độ.  Yaok sa sang iek ruak nan hu 2.000 khge ndih iek ruak, dalam nan hu 200 khghe ka urang ruak trak – ICU, saong 70% dom khghe hu jamriak suak yava oxy.  Gam haong nan, karja palei jeng hu panuac ieu dom hotel 4 saong 5 patuk caga ngak jeng dom pasak iek ruak Covid-19. Harei 12/4, bang Ma-ha-rát-xtra daok hu jaik 52.000 urang dương tính bahrau haong virus SARS-CoV-2,  saong 258 urang metai kayua Covid-19. Dahlau di nan 1 harei, bang ini hu labaih 63.200 urang njom Covid-19 dalam 24 mon, lac glaong di abih kuhria meng tuk hu jit.

Urang jakar pak ni brei thau, bruk cuh phao hu mbaok di dom sĩ quan cảnh sát bahrau rah tabiak di sa sang bac THPT di bang Tennessee, gah Đông Nam negar Mỹ dalam beir harei 12/4 (tuk vak pak ni) , ngak ka sa urang metai song sa sĩ quan njauk rambuac./.

Urang lang: Hanipha- Mousaphuong - 13/4

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân