Urang mek mau dut iek ruak Covid-19 di huyen Can Gio -TPHCM

 

Tui Pasak Pasang iek ruak kik Ban raya HCM, ruak meng virus Delta lac janih virus njom mbak khang nan ye jit ruak mbang ini tamuh tabiak saong njom mbak dalam sang, labik daok trọ, labik ngak bruk, sang ngak bruk glaong rilo tal, labik ngak pandap takik hu ngin tame, mac la-ar praong. Tui kuhria mboh, anek ruak Delta njom mbak rilo jang biến thể Alpha labaih 60%.

Urak ini, ban raya daok patagok bruk duah urang taom gaok manuac ruak, pacang labik piah padam ruak, peih praong bruk dut iek ruak di dom labik mbuan njom ruak rilo piah duah thau ruak njom meng halei; padang bản đồ ruak ka dom sruh jit ruak, parabha dom labik mbuan njom ruak di quan, huyen, piah meng nan hu panuac brei karja palei peih bruk mek mau dut iek ruak, njauk manuac, plaih palai pajoa jien padai, saong tapa nan tabiak bruk lac labik halei njauk pacang veik, peih praong bruk mek mau dut iek ruak, pacang cakak ruak pambak tabiak. 

Tui bruk ba tabiak brei mek mau dut iek ruak samar di ban raya, brei mek labaih 200.000 mau dut iek ruak sa harei. Gam haong nan, ngak iek bruk dut iek ruak samar di dom labik ngak kong kayua dom D.N bayar jien, brei dut iek ruak veik di dom labik mbuan tamuh ruak glaong piah plaih ruak njom mbak dalam bhap bini. Di dom labik pacang veik, brei dut iek ruak meng 2 tal 3 harei sa mbang. Daok di dom labik mbuan tamuh jit ruak glaong, brei mek mau meng 5-7 harei sa mbang.

Ban raya daok peih praong labik brei daok karei pataom gauk hu 30.000 gaiy laneing. Dom quận, huyện saong Ban Thủ Đức ba tabiak jalan ngak lac yaok đơn vị hu meng 300 – 400 gaiy laneing ndih karei tui tanut chuan di Mentri Y tế saong di UB bhap bini Ban raya. Parilo labik brei daok karei di khách sạn dalam ban. Bruk khik iek, pacang caga njom mbak tapa gauk dalam labik daok karei jeng hu brei ngak catang piah patakik urang ruak, plaih bruk tapa prein taong ruak di dom sang iek ruak.

Gah y tế Ban raya ba tabiak bruk ngak iek urang F1 daok karei dalam 14 harei saong tui iek prein yawa di sang 14 harei patui di nan, tui tanut di Mentri Y te saong lagaih haong bruk di dom labik, khik kajap bruk oh brei ruak njom mbak tabiak bhap bini.

Tui Pasak Pasang iek ruak kik, Ban raya hu caga bruk taong ruak ka 15.000 urang ruak, tui nan parabha 3 pakat taong ruak tui jalan 3 tal di Mentri Y tế. Langiu bruk daok ba tabiak jalan taong ruak 20.000 gaiy laneing ndih, hu ginup menuac ngak bruk saong dom pandap y te, Ban raya HCM daok brei ba 500 bac sĩ saong 1.500 điều dưỡng, kỹ thuật viên meng dom sang iek ruak trung ương, mentri, dom gah daok di ban raya piah daong bruk iek ruak di dom sang iek ruak Covid-19 di dom canah jalan praong tame Bei Gon. Gam haong nan, daok pok panuac tagok Mentri Y te brei pabak 1.000 bac si, 4.000 điều dưỡng saong urang ky thuat, 500 urang ilamu, sinh vien gah y tế công cộng saong y học dự phòng piah duah urang taom gaok manuac ruak.

Pambuak tal bruk klauk vaccine pacang Covid-19, tui Pasak Pasang iek ruak kik, tapa 4 mbang klauk jru, abih tih urang hu klauk jru lac 985.077. Ban raya daok patagok bruk klauk pabak vaccine piah pacang njom mbak dalam bhap bini. Ini lac jalan ngak suai lavik, abih di nyu nan lac ngan saong dom bien chủng njom mbak samar, jeng yau caga bruk tamuh dom anek ruak birau. Langiu di nan, pasiam dom adat, dom jalan ngak dalam bruk klauk jru ka nyu lagaih haong bruk daok rah tabiak piah samar hu biak rilo menuac hu klauk vaccine. Urak ini, Ban raya daok hu jalan klauk jru vaccine mbang ka 5 ngan saong 100.000 mbang kayua Mentri Y te parabha brei, dom quan, huyen saong Ban Thu Duc meda peih bruk klauk jru tui angan di dom urang hu klauk dahlau tui Sarak 21./.

Urang lang: Ai Nghiem – 13/7/2021

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân