Bimon Tháp Đôi 

 

Bình Định lac sa dalam dom labik daok khik ramik ilamo Cam hu sa jaman biak hadah tanjak. Dom bimon kalan Cam ribau thun di tỉnh Bình Định biak karei, biak ginreih, brei mboh ilamu padang ngak saong ilamo Chămpa di yaok vaktu cak rok patagok karei di gauk. Dalam nan njauk ndom tal dom baoh bimon kalan yao klak.

Mbluak di abih nan lac bimon Tháp Đôi hu padang ngak di puac abap 12. Inem mek ini daok di phường Đống Đa, bal Quy Nhơn, hu ba tame janih gheih abih di ilamo kiến trúc Chămpa. Bimon Tháp Đôi hu dua baoh bimon: bimon praong glaong 20 m, bimon sit glaong jaik 18 m. Ini lac labik dui pachreih biak rilo tuai damuai mai rivang iek dalam dom baoh bimon kalan yao klak di tỉnh Bình Định.

Bimon Tháp Đôi daok di kreh pasak bal Quy Nhơn, tỉnh Bình Định. Bruk ba pandar inem mek ini oh ka samu haong yaom di nyu. Urak ini, inem mek Tháp Đôi hu pasiam veik rup bimon min mblang bein biak sit, oh meda peih ngak hu dom bruk daoh tamia saong dom bruk karei karei.

Bình Định hu 8 baoh bimon kalan daneiy angan nan lac: Bánh Ít, Dương Long, Tháp Đôi, Cánh Tiên, Phú Lốc, Thủ Thiện, Bình Lâm saong Hòn Chuông. Jaik ribau thun nao tapa min dom baoh bimon kalan Cam pak ini jeng daok yau tamo, yau sa drap ar prong, lac labik dui pachreih tuai atah jaik mai rivang ma-in. Biak damen lac, kein laba  meng bruk ba pandar dom inem mek ini daok biar.

Tui dom urang roh duah ilamo di tỉnh Bình Định, makna lac kayua dom inem mek bimon kalan Cam di Bình Định daok prai rai grauk labik nan ye biak kan dalam bruk khik iek. Langiu di nan, cơ sở hạ tầng di dom baoh bimon kalan Cam oh pabak hu hatai caong khin di tuai damuai.

Dom labik mai rivang ma-in ini jeng oh hu pablei pandap lưu niệm, oh hu labik pablei pandap mbang menyum, ma-in bui sambai atau danak dak daoh tamia di labik.

UB bhap bani tỉnh Bình Định hu jao ka Sở Ilamo saong padhih tỉnh padang danak dak “Xã hội hóa bruk khik iek, ba pandar dom inem mek sajarah – ilamo labik gheih mekre dalam tỉnh Bình Định” piah khik ramik saong patagok yaom dom inem mek sajarah pambuak pagam haong cak rok patagok bruk rivang ma-in, dalam nan caik hatai ngak brei patagok yaom dom baoh bimon kalan Cam yao klak  biak karei di tỉnh ini./.

Urang lang: Jasi -13/6/2021

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân