Daok di angaok mbuan Bà Nài, phường Phú Hài, bal Phan Thiết, bimon Pô Sah Inư hu jeng labik pachreih tuai damuai mai rivang iek tuk mai tal Bình Thuận. Bimon Po Sah Inư hu padang ngak meng abap IX, hu karja brei angan lac inem mek sajarah pakat negar dalam thun 1991. Yaok thun, di labik ini hu rah tabiak rilo adat prong di urang Cam. Abih di nyu lac bilan mbang Ka-tê, di pak ini pachreih hu biak rilo tuai damuai mai rivang ma-in saong duah thau ka ilamo Cam.

Piah khik ramik saong cak rok patagok yaom inem mek bimon Pô Sah Inư, thun 2017, Sở Ilamo Padhih saong Rivang ma-in tỉnh Bình Thuận hu ba tabiak danak dak “Khik ramik, pasiam veik saong patagok yaom inem mek bimon Pô Sah Inư”. Danak dak hu brei ngak saong yaom jien abih tih 29 tỷ 829 triệu đồng, hu dua bruk ngak prong. Nan lac pasiam veik bimo kalan saong padang ngak dom bruk oh daok dalam bimon kalan yau: sang khik iek, ngak bruk pagam haong parang iek; sang parang me-in daoh tamia; dom ki-ot pablei pandap lưu niệm; paga pacang khik caga inem mek...

Ong Nguyễn Văn Hoà, urang ngak gah Jabat Kế hoạch – Tài chính, Sở Ilamo Padhih saong rivang ma-in tỉnh Bình Thuận brei thau, urak ini bruk pasiam veik bimon kalan Pô Sah Inư hu ngak salah blaoh saong hu ba tame pandar duh ka bruk rivang ma-in. Dom bruk ngak yau Sang khik iek, sang pablei harak, dom ki-ot hu ngak blaoh min ka oh hu pasang iek, taong yaom piah ba tame pandar. “Urak ini Sở jeng hu peih ngak danak dak blaoh, jalan ngak yau habar, peih ngak yau halei jeng hu ba tabiak jalan ngak abih blaoh. Urak ini drei ka oh laghaih piah  ba tame pandar min. Nan lac danak dak ka oh hu pasang iek, taong yaom, jao brei piah pandar”.

Tui Sở Ilamo Padhih saong rivang ma-in tỉnh Bình Thuận, dalam tuk padang ngak dom bruk oh daok dalam bimon kalan hu tamuh tabiak bruk đục patau piah ngak takai ka dom công trình. Kayua yau nan ye, tal harei ini hu dom bruk oh ka ngak salah kayua daok cang kuhria veik yaom jien tamuh tabiak rilo jang saong cang harak brei ramik veik danak dak.

Ndom ka jalan pasiam veik bruk suai damuai dalam padang ngak dom labik, ong Bùi Thế Nhân – Akaok Sở Ilamo Padhih saong rivang ma-in tỉnh Bình Thuận brei thau: “ Caong khin gah pasang iek njauk hu harak gar blaoh gah thiết kế jeng brei thau panuac di drei piah gah buh jien ngak taduan bruk tamuh tabiak nan, lac njauk halei oh saong ngak bruk cambaih laih haong gah dang tabiak ngak, piah mboh lac patui ngak veik halei oh piah hu jalan langyah ka nyu salah blaoh. Kham merat langyah dalam bilan 6, puac quý 3 lac ba tame pandar duh ka tuai damuai mai rivang ma-in”.

Piah samar ngak salah saong ba tame pandar dom bruk oh daok dalam bimon kalan Pô Sah Inư duh ka bruk rivang ma-in, abih di nyu lac bilan Katê thun 2021 jaik mai tal (lac bilan 10 Saka aia harei), brei hu bruk samar drah di Sở Ilamo Padhih saong rivang ma-in Bình Thuận gam haong dom gah pambuak pagam tal./.

Urang lang: Jasi -13/6/2021

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân