Rilo jalan padang ngak var ro ka anek athur hu batabiak 

Dom thun jaik di ini, bruk pacang khik alam môi trường di dom labik raong glang hu tỉnh Đồng Nai biak sangka ngan haong rilo jalan ngak catang yau: ba labik raong glang tabiak truh labik daok dalam palei; tok brei adat ka dom labik raong praong hu jalan langyah aia neriak tachauk tui adat hukum; paglaong tiêu chí gah alam môi trường dalam padang ngak palei pala bahrau, gam haong nan lac jhul khang bruk raong glang dalam mblang bein praong; raong glang ilamu glaong (hacaih sa-at, VietGAP, saong van la-ar).

Akaok bilan 3/2021, UB bhap bani tỉnh Đồng Nai hu tabiak harak taong phạt jien 330 triệu đồng, brei padeih raong piah pasiam veik dalam tukvak 90 harei ngan haong labik raong menuk mebaoh labaih 120.000 drei, mblang taneh van ro 8.350m2 di Cty Sinh Học Đồng Tâm hu jabat daok di palei Hưng Bình, xã Hưng Thịnh, huyện Trảng Bom. Tapa pasang iek tapak di Sở Tài nguyên saong Môi trường, ye jalan pataom mek aia nerak di van ro raong glang ini nyu oh njauk haong pathau khan taong yaom tác động môi trường tui harak adat brei ngak, yau: oh padang ngak jalan xử lý aia nerak. Oh pataom mek aia nerak meng bruk ngak yaok harei bo brei ka nyu njaom tame taneh dalam mblang bein raong glang. Oh ka hu jalan xử lý mùi mbau tui njauk jalan ngak hu ba tabiak dalam pathau khan tác động alam môi trường...

Atau yau harei 30/3/2021, balai raong glang saong thú y huyện Cẩm Mỹ, tỉnh Đồng Nai jeng hu taong phat jien ka bruk ong Trần Hữu Quyền po labik raong pabui (xã Lộ 25, huyện Thống Nhất) kayua ba lam suan adat hukum 138 drei pabui metai kayua apui khuah. Ong Trần Đình Sĩ, akaok balai raong glang saong thú y huyện Cẩm Mỹ, brei thau: “tui adat, jien taong phạt ka bruk ngak suan nan meng 6 - 8 triệu đồng, khaol dahlak palih ruah tanut glaong di abih”.

Amuk Nguyễn Thị Cát Tiên, akaok UB bhap bani huyện Xuân Lộc brei thau, huyện Xuân Lộc hu jaik 500 mblang bein raong prong. Tal urak ini, taong abih dom labik raong hu mboh tangin sanya peih ngak jalan xử lý aia nerak tui njauk adat, pabak tiêu chí môi trường njauk tui chuẩn palei pala bahrau. Pandar năng lượng khí thải ngak pandap cuh, khak saong aia neriak pandar buh ka phun pala gam patrun nerak alam môi trường, gam patak pataom hu jien padai.

Daok di huyện Cẩm Mỹ, rilo thun ini mai, pak ini hu brei laik phone jalan talei pandiak ka bhap bani. Tui nan, tuk bhap bani mboh aia nerak, khí thải rilo meng dom labik raong glang ye meda iew phone tal jalan talei pandiak dalam 20 minit, oh lac harei atau melam meda hu urang jakar môi trường mai tal labik, mek mẫu ba nao dut iek. 

Abih tih tapon pabui dalam tỉnh Đồng Nai jaik 2,5 triệu drei, dalam nan raong dalam mblang bein praong meblah labaih meteh, abih tih tapon menuk lac labaih 9 triệu drei, dalam nan hu 80% raong dalam mblang bein praong. Piah patak pataom jien padai langyah pandap nerak tachauk, patagok jien mek tame, dom mblang bein raong praong urak ini daok buh jien tame ngak gah ngak nong hacih sa-at; atau pambuak bruk haong dom doanh nghiệp ngak khak hữu cơ piah langyah bruk nerak tachauk. Langiu di nan, tỉnh Đồng Nai jeng daok pachreih dom baoh sang raong glang pambuak bruk haong dom Cty yau: C.P, Japfa, Emivest piah ngak jeng bruk pambuak gauk. 

Bruk njauk biai nan lac, dalam tukvak anak tal, bruk pasang iek môi trường tự động di dom labik raong glang meda hu pagam ngak iek piah patrun bruk nerak tachauk halau aia, không khí. Dom gah môi trường, ngak nong hu sanya daong ilamu kỹ thuật caik pagam, peih ngak hệ thống langyah môi trường aia, không khí di dom labik raong glang./.

Urang lang : Jasi -12/5

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân