VOV4.Bahnar - Kơdră jang tơbôl Mi Antony Blinken năr 21/01 hlôi tơ ƀơ̆p Kơdră jang tơbôl tĕh đak Nga Sergei Lavrov tơ̆ Geneva (Thụy Sĩ) vă pơma dơnŭh găh tơdrong vei lăng sơđơ̆ng, lơ̆m au đei tơdrong tĕh đak Ukraina. Kơdră jang tơbôl ƀar tĕh đak drơ̆ng mĭnh nơ̆r gô hơnơ̆ng pơma dơnŭh găh tơdrong au. Iung pơma tơ̆ hop akŏm tơbăt ăn khŭl chĭh kơtơ̆ng ang lăp đơ̆ng rŏng tơ ƀơ̆p, Kơdră jang tơbôl Mi Blinken tơbăt, ƀok trŭh tơ̆ Geneva đơ̆ng rŏng lơ ‘măng pơma dơnŭh ƀar păh rim kơdră jang tơbôl Mi păng Nga lơ̆m giĕng hơdrol lơ̆m tơdrong pơgơ̆r Pơma dơnuh Sơđơ̆ng trong jang, ‘măng hop akŏm Jơnŭm vei lăng NATO-Nga, păng ‘măng hop akŏm Jơnŭm chĕp pơgơr Khŭl vei lăng Sơđơ̆ng păng Jang hơdoi châu Âu găh tơdrong sar bar tơ̆ Ukraina păng rim tơdrong găh sơđơ̆ng să hloh dơ̆ng kơ châu Âu. Kiơ̆ kơ ƀok Blinken, păh Mi hlôi tơlĕch ăn mĭnh ƀar nơ̆r athei atŏk kơtang vei lăng sơđơ̆ng păng rim tơdrong mă ƀar păh gơ̆h tơchă đei mĭnh ƀơ̆r đon.

Tơblơ̆ nơ̆r: Amazưt