VOV4.Jarai-Thun 2020 lĕ thun tơnap tap biă mă kơ
anom bruă ia jrao Dak Lak lơ̆m hơmâo sa
rơwư̆ dua mơta tơlơi duăm ruă klin kheng ngă, anun lĕ klin Covid 19, klin kman
ngă ruă rơkông đok. ƀơi anăp kơ tơlơi tơnap tap anun, hăng tơlơi glăm ba laih
anun bruă ngă khut khăt mơ̆ng ƀing nai ia jrao, ơi ia jrao hăng abih bang
mơnuih mă bruă amăng anom bruă ia jrao tơring čar Dak Lak hơmâo pơtrut đuăi hĭ yơh
klin kheng, kiăng ba glăi tơlơi mơak kơ mơnuih ƀôn sang.
Pô čih tơlơi pơhing phrâo Gong phun jua pơhiăp
Việt Nam dŏ ƀơi kual Dap Kơdư hơmâo bưp, ră ruai hăng Nay Phila, Khua Gơnong
bruă ia jrao tơring čar Dak Lak kơ hơdôm tơlơi gir run sa thun rơgao laih anun
pok pơhai bruă mă wai pơgang tơlơi suaih pral kơ mơnuih ƀôn sang, pơhlôm pơgang
klin thun 2021.
-Ơi ơi Nay Phila,
thun hlâo anom bruă ia jrao Dak Lak hơmâo bưp lu tơlơi tơnap tap lơ̆m sa rơwư̆ hơmâo
dua klin ƀă, anun lĕ klin Covid 19 hăng kman ngă ruă rơkông đok. Anom bruă ia
jrao tơring čar Dak Lak hơmâo hơdôm hơdră hơgĕt pơsir hĭ dua klin anai ?
-Nay Phila: Hăng klin kman ngă ruă rơkông đok lĕ tơdơi kơ
ƀuh hơmâo mơnuih ƀă, hlong pơgăn anih mơtam laih anun brơi tlâ̆o ia jrao
vaccine pơgang kma ngă ruă rơkông đok mơtam. Bơ klin Covid 19 lĕ aka ƀu hơmâo
ia jrao vaccine ôh yua kơ anun bruă ngă blung a khŏm kang anih pơgang, hơduah
ĕp tui kru hăng mă drah, mă ia khak, ia bah pioh ba pơčrang tơdah ƀuh kiăng hơmâo
hơdră bong glăi hŭi lar hyu amăng plơi pla.
Kơ mơnuih mă bruă lĕ
rơngiao kơ jak abih bang ƀing mă bruă amăng gơnong bruă ia jrao ƀu hmâo pô
pơdơi ôh laih anun jak iâu ƀing hrăm gah bruă ia jrao djru hrom wơ̆t hăng ƀing
pơdơi abih thun bruă hai, ăt glăi djru hrom mơ̆n pơhlôm pơgang Covid. Hrom hăng
anun, iâu pơthưr dơ̆ng lu ơi ia jrao pơdơi abih thun bruă phrâo hơdôm thun giăm
anai glăi djru hrom hăng jak iâu ƀing hrăm ơi ia jrao thun tal rơnuč laih, brơi
gơñu djru hrom amăng bruă pơhlôm pơgang klin kiăng djru mă ia bah, ia khak
ƀudah mă drah mơnuih duăm ruă pioh ba pơčrang kman giong anun kăng anih pơgăn
ƀu brơi tơbiă hyu ôh mơ̆ng anih hơmâo klin.
-Bơ hơdôm hơdră
pơgang tơlơi suaih pral kơ mơnuih ngă bruă gah ia jrao hăng pơgăn anŏ ƀă hyu
kman gơnong bruă ia jrao pok pơhai ngă tui hiưm pă ơ ơi ?
-Nay Phila: Anom bruă ia jrao
lăi pơthâo hăng Jơnum min mơnuih ƀôn sang tơring čar brơi blơi gơnam yua mă
bruă pơhlôm pơgang djop mơnuih mă bruă gah ia jrao ăt kah hăng man pơdong anih
pơčlah phara, brơi ƀing ngă bruă gah ia jrao dŏ amăng mông mă bruă djru pơhlôm
pơgang klin, tăp năng wơ̆t hăng mơnuih ƀă laih kman kiăng hmâo anih pơjrao djơ̆
lăp, mă drah, ia khak ƀudah tui kru ĕp mơnuih hơmâo jĕ giăm hăng pô ƀă kman.
Kơnong kơ sang ia
jrao lĕ rơngiao kơ ngă tui Djơ̆ hră pơtrrun mrô 3088 mơ̆ng Ding jum ia jrao, 4
hơdră tơring čar pơtrun dăp lui hơdră pơhlôm hlâo amăng mông ječ ameč, pơkra
ming anih dŏ anih ngă sang ia jrao pơjrao mơnuih ruă ƀă kman, bĕ hĭ tơlơi mơ̆ sa
boh sang ia jrao, ngă dua boh anih pơkă lăng hăng pơjrao pơčlah phara mơtam.
-Klin Covid tal 3
anai hơmâo glăi dơ̆ng giăm hrơi ngă yang thun phrâo ƀong tết Tân Sửu laih rơgao,
ngă kơ anom bruă ia jrao tơring čar Dak Lak ăt khŏm răng lui hlâo kơtang biă
yua tơring čar Gia Lai, tơring čar giăm hăng Dak Lak hơmâo laih mơnuih ƀă klin
amăng plơi pla. Anom bruă ia jrao tơring čar Dak Lak hơmâo hơdră hơgĕt pioh
bong glăi hăng tơlơi anai?
-Nay Phila: Amăng hơdôm hrơi ngă
yang thun phrâo ƀong tết abih bang ƀing ngă bruă gah ia jrao, ơi ia jrao, nai
ia jrao ƀu hơmâo pô hlơi pơdơi ôh laih anun pơpha mă bruă 3 wơ̆t bơblih nao rai
amăng sa hrơi ăt kah hăng iâu pơtum djop mơnuih hăng mă yua djop mơta gơnam mă
bruă pơhrua nao laih anun ƀing gơmơi pơmin nao kơ hơdră amra jak iâu abih bang
mơnuih mă bruă amăng gơnong bruă ia jrao gah ling tơhan kông an, ling tơhan
blah ngă wơ̆t hăng ƀing pơdơi abih thun bruă laih ăt djru hrom mă bruă sit
hơmâo klin hơđuh rai.
Anai lĕ tơlơi gir
run ƀu thâo gleh ôh gah anom bruă ia jrao khŏm ngă kiăng kơ tơring čar Dak Lak
hơđong rơnuk rơnua, ngă tui djơ̆ bruă mă pơgang hăng pơjrao tơlơi duăm ruă
amăng bơyan mơak thun phrâo ƀong tết laih rơgao.
-Ơ lah, bơni kơ ih hŏ!
Nay Jek-Siu
Đoan: Pơblang