Yaom ameh dalam taneh ia page ini trun tui yaom ameh dunya saong laik tapa yaom 56 trieu sa mbaik

Page harei 4 bilan3, Pasak pasang iek ruak kik Ban raya HCM brei thau, urak ini huyện Cẩm Giàng, tỉnh Hải Dương hu 19 palei, labik daok di bhap bini di 8 xã, ban sit daok hu jit Covid-19, daok brei pacang cakak tui Sarak 16 - Pasak pasang iek ruak kik Ban raya HCM. Kayua yau nan ye, urang mai meng dom bhum jit di huyện Cẩm Giàng, tỉnh Hải Dương tal Ban raya HCM dalam 14 harei kuhria meng harei tabiak truh palei njauk brei daok karei pataom sa labik, mek mẫu dut iek ruak 4 mbang di harei 1, 5, 10 saong harei 14. Ban raya jeng brei ngak tui bruk patah di gauk, dut iek ruak ngan saong urang mai meng klau labik di Hải Phòng daok brei pa-atah di gauk tui sarak 16; daok peih bruk taduan mek brei thau gah y tế, mek mẫu dut iek ruak di mblang kapal haok, mblang radaih, radaih pui, labik pataom ralo manuac yau darak, kuan mbang, baha…Kuhria meng ahrei 17 bilan 2 mbiah tal ini, Ban raya hu mek 22.036 mẫu dut iek ruak di dom labik angaok nan, dalam nan hu 20.652 âm tính, 1.384 daok cang brei thau.

Tui yaok pataom di gah biên phòng tỉnh Kiên Giang, meng akaok bilan 1/2021 tal urak ni, abih tih dom urang tame negar nao tapa pabah mbang negar pakat dunya Hà Tiên lac jaik 3 ribau urang. Min, dalam dom harei puac bilan 2 saong akaok bilan klau ni, bhap bini pataom tame ngak harak gar likau tame negar biak rilo, hu harei tagok tal yaok rituh urang. Kayua Campuchia hu mbang tamuh viek jit COVID-19 nan ye rilo bhap bini di Campuchia jeng duah jalan mai palei negar. Bier harei 3-3, Đồn Biên phòng Cầu Muống (huyện Hồng Ngự, Đồng Tháp) hu taduan, pambuak haong karja palei ngak harak adat saong ba nao daok karei abih 14 urang tame tanegar suan hukum meng Campuchia tame Việt Nam tapa kraong Sở Thượng.

Yaom ameh dalam taneh ia page ini trun tui yaom ameh dunya saong laik tapa yaom 56 trieu sa mbaik. Di Công ty Ameh pariak Đá quý Phú Nhuận, yaom ameh SJC trun 50.000 đồng sa mbaik blei tame saong 100 ribau đồng sa mbaik pablei tabiak dut saong yaom tuk kreik pabah mbang harei kabroi, yaom blei tame 55,5 triệu đồng sa mbaik, pablei tabiak 55,9 trieu đồng sa mbaik. Biar harei kabroi 3/3, yaom ameh dunya trun labaih 2%, lac yaom biar di abih dalam jaik 9 bilan tuk jien laba hala phiếu Rajaei Mỹ saong jien USD ngak patrun prein dui pachreih di ameh.

Jabat Cảnh sát pasang iek Công an tỉnh Bến Tre hu tabiak harak khởi tố bị can saong cap khik Nguyễn Thị Thanh Thúy, ndik tapui thun 1972, daok di puk Ao Vuông, xã Phú Long, huyện Bình Đại ka duas “pachot meblah mek drap ar”. Dalam tuk vak atah, pambak tame bruk ngak po dom talei hụi saong meng hatai jia di dom urang main hụi, Thúy pachot urang piah meblah mek jien padai di dom urang main hụi, abih tih lac 17 tỷ đồng. Di tukvak pacah hụi, Thúy daok ngak po 32 talei hụi saong daok tavak sraiy di 166 urang me-in hụi.

Dua mbang kapal haok pajeng bhap bini Việt Nam di Myanmar mai taneh ia birau par trun mblang kapal haok Nội Bài page harei 4/3. Dom mbang par kayua Hãng kapal haok negar Vietnam Airlines peih par dalam tuk taneh ia Myanmar daok sraw kadau khang. 390 tuai angaok dom mbang par tui bruk ba tabiak di Rajaei, hu raidiuk kan kandah, khin mai taneh ia samar. Dua mbang par tui kuhria hu ba tuai mai mblang kapal haok Đà Nẵng tuk biar harei ini.

Dalam harak ndom puac di melam 3/3, Thủ tướng Campuchia Hun Sen hu tabiak adat ka urang jakar brei hu jalan pacang cakak urang halei tabiak truh tỉnh Preah Sihanouk. Jalan ngak ni piah pacang cakak bruk njom mbak di virus SARS-CoV-2 ba tal jit COVID-19 meng tỉnh Preah Sihanouk tapa dom labik karei. Karja tỉnh Preah Sihanouk brei thau kuhria tal maong 12 melam 3/3, dom urang ngak gah y tế hu mek abih tih 9.970 mẫu, dalam nan hu 71 mẫu dut iek mboh dương tính haong virus, lac 60 urang Trung Quốc, 5 urang kumei negar Việt Nam saong 6 urang Campuchia.

Dalam sa kham merat jhul samar bruk klauk jru vaccin pacang Covid-19 piah pacang hu ruak dalam bhap bini, Trung Quốc ba tabiak bruk kham ngak hu bruk klauk jru ka labaih 64% bhap bini di puac thun ini. Khaw tin angaok nan hu ba tabiak di sa nyaom biai online birau ini di dom urang jakar mai meng pasak pasang iek saong pacang caga jit ruak di dalam negar Trung Quốc, piah caga ka bruk jhul samar bruk klauk jru vaccine pacang Covid-19 praong di taneh ia ini tukvak anak tal./.

Hu takik di nyu 6 rahra metai saong rilo urang karei njauk rambuac dalam sa mbang taong tame di kol thánh chiến pamaong tame ban Dikwa, gah Đông Bắc Nigeria. Mbang taong ni rahtabiak di puac bier harei 2/3 meng dom urang par phao di gah kanja Hồi giáo Tỉnh Tây Phi. Langiu di dom urang metai saong njauk rambuac daok hu dom urang daok lahik saong yaok ribau urang daok duah jalan nduac tabiak trun ban sit nan, dahlau di nan, Liên hợp quốc (LHQ) hu panuac lên án khang bruk taong tame nan. Tui LHQ, dalam mbang taong ini, dom jabat ngak pahla saong sang iek ruak njauk pui cuh khuah atau khut tayah./.

Urang lang: Thu Thảo – Ái Nghiêm – 04/03 15:51:13

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân