Rayo Sap ndem Viet Nam ba tabiak dua bruk pakacah

Biar harei kabroi, di mbang họp báo Rajaei bilan 2 kayua Akok Mentri, Akaok Jabat Rjaei Mai Tiến Dũng dang akaok, rilo bruk yau tukvak klauk jru Vaccine pacang Covid-19, jalan lang talaih tavak tavaiy di kaya nong dom labik hu jit atau paok jien daong dom urang gaok kan kandah kayua Covid-19 lac dom bruk hu urang di Rajaei pataom tame khan brei thau. Javap calei panuac tangi sua ka tukvak klauk jru vaccine pacang ruak Covid-19, Thứ trưởng Mentri Y tế Trương Quốc Cường brei thau: Jru vacicne akaok meti di công ty AstraZeneca (Anh) hu mai tal Việt Nam harei 24/2, anak tal Hải Dương meda lac tỉnh brei klauk jru dahlau. Urak ini, Mentri Y tế jao ka Viện kiểm định vaccine Mentri Y tế pasang iek jru vaccine nan. Bruk pasang iek nan hu ngak salah blaoh. Yau nan min, dahlau di tuk brei klauk ka bhap bini, gah Viet Nam daok cang jabat pasang iek karei di gah Y tế negar Hàn Quốc.

Dah page ni 3-3, di sang bac THPT Hùng Vương (quận 5, TPHCM) rah tabiak bruk jao - taduan lin thun 2021. Di labik jao lin ini hu 468 dam dara naih gheih di dom quận 5, 6, 7, 11, Gò Vấp, Tân Bình, Bình Thạnh tagok jalan nao ngak bruk dalam bol bala bhap bini saong CA bhap bini. Thun 2021, TPHCM hu brei bruk pilih ruah, ieu jaik 5.000 rahra nao ngak lin, dalam nan hu jaik 800 rahra nao ngak dalam gah CA bhap bini saong 2 urang kumei. Chất lượng jao lin thun 2021 daok hu khik kajap. Thun ni, kayua jit Covid-19, TPHCM oh peih ngak praong, min hu peih bruk pathau khan y tế saong dut iek SARS-CoV-2 ka taong abih rahra di 2 harei dahlau.

Salam uan bruk jak jeng siam mekre di Nyaom roya pakat negar mbang XIII di Đảng, Rayo Sap ndem Viet Nam ba tabiak dua bruk pakacah lac: “ Ba sarak di Đảng tame raidiuk” saong pakacah tui jalan trắc nghiệm: “Đảng dalam raidiuk dahlak”. Bruk pakacah kadha papar sap “Ba Sarak di Đảng tame raidiuk” brei ka urang vak, urang bien tap, uranmg pambuak bruk hu kadha vak báo chí papar sap pathau khan ka sarak Nyaom roya XIII di Đảng hu papar sap angaok Rayo sap ndem VN atau di riyak rayo Papar sap - Papar binguk dom tỉnh, ban yaoh khan dom asar kadha di Sarak Nyaom roya Đảng pakat negar mbang ka XIII, gam haong nan, brei pambak praong dom jalan ngak gheih di Mentri, Ban, bhum palei, urang ba dom Sarak di Đảng tame raidiuk. Dom kadha pakacah hu dua janih: khau tin, kadha vak brei thau saong asal kadha. Tukvak taduan kadha pakacah meng harei 1 bilan 3 tal harei 30 bilan 9 thun 2021.

UBND huyện Mộc Châu, tỉnh Sơn La bahrau tabiak harak taong phat 25 triệu đồng urang ngak suan adat pacang caga jit ruak Covid-19. Bruk ngak suan nan lac, Harei 24/02/2021, ong Nguyễn Hồng My saong anek lakei meng labik daok lac xã Tân Hương, huyện Ninh Giang, tỉnh Hải Dương mai tal ban sit Mộc Châu, huyện Mộc Châu, tỉnh Sơn La – nan lac mai meng bhum pacang cakak jit covid – 19 tal labik oh hu jit, min oh tui bruk pasang iek, langyah y tế dahlau di tuk tame tabiak bhum jit di nyaom A. Hadei di tuk thau hu bruk nan, huyện Mộc Châu tabiak harak taong phat jien saong ba ong Nguyễn Hồng My haong anek likai nao daok karei di labik daok karei pataom gauk di huyện.

Rayo khí tượng thủy văn bhum Meraong negar mboh lac langik tasik gah Meraong hu tani tanat gilac veik, dom mbang hajan karei bilan kayua langik la-ar oh daok, nan ye langik pandiak aval di dalam bhum. Daok ban raya HCM, langik pandiak glaong abih meda meng 34 tal 35 độ C, min drei meda mboh yau langik pandiak jang. Langik pandiak meng mong 11 tuk tal mong 3 biar harei yaok harei saong dui atah meng harei ini, 3-3 tal harei 7 bilan 3. 

Tui kuhria dalam 1 adit, meng harei 5 tal harei 12 bilan 3, Lào meda peih bruk klauk vacine caga Covid-19 ka dom urang hu klauk dahlau di abih, dahlau di tuk klauk ka rilo rahra. 3 kapul urang hu klauk jru dahlau di abih dalam mbang ni lac dom urang ngak gah y tế, urang ngak di pabah mbang negar saong urang khik ramik di dom pasak brei daok karei di dalam negar. Ong Phonepraseuth Ounalom – akaok Cục Dịch tễ saong prein yava di mintri Y tế Lào brei thau: tui kuhria bruk klauk mbang camriep lac meng harei 5 tal harei 12/3 saong mbang klauk hadei lac meng harei 5 tal harei 10/4/2021.

Tui hãng thông tấn Kyodo, Rajei Nhật Bản iew Trung Quốc oh pacap dom bhap bini Nhật Bản tame negar ini brei mek mẫu dut iek ruak Covid-19 tapa jalan taok salih ka mek di tarakong saong idung hadei tuk taduan hu panuac ndem meyai ka bruk mek mẫu ngak pandik pandua, tui nan brei panuac lac jalan ngak yau nan “oh ka mboh labik halei ngak di dunya ini”. Dahlau di nan, Mỹ jeng oh njauk hatai saong Trung Quốc hadei tuk dom urang jakar Mỹ hu mek mẫu dut iek ruak oh dreih thei di Bắc Kinh.

Truyền thông Mỹ harei kabroi (2/3) brei thau, sa bala radaih ginuk gauk trak rahtabiak di gah maraong Ca-li-phoóc-ni-a, Mỹ ngak ka takik di nyu 15 urang metai, labaih 10 urang njauk rambaic. Bala atah di jalan tapen negar Mỹ saong Mê-xi-cô 16 ki-lô-mét. Sa sruh radaih thể thao ginuh haong 1 sruh radaih tải. Sruh radaih thể thao hu prein pajeng 8 urang min radaih ni pajeng tal 28 urang. Dom urang njauk bala jeng lac urang Mê-xi-cô tame negar Mỹ suan hukum./.

Urang lang: Ái Nghiêm – Thu Thảo – 03/03 14:53:56

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân