Cập nhật ngày: 8/11/2015

Salam mikva saong taong abih gauk, Daa mikva saong taong abih gauk pang harak ilamu harei adit yaih khan dom ragu daoh bhap bini di dom bangsa takik ngan saong kadha: “daoh ka bruk ngak mbang pala drak”

 

Mikva urang pang rayo anit ranam! Panuac pandao, ragu daoh bhap bini hu tabiak meng bruk ngak mbang, mai meng bruk ngak mbang bo ong muk drei hu paneh tabiak dom kadha daoh bhap bini lai li-ar, bingi pang. Meda lac kayua yau nan, dalam gilang ragu daoh bhap bini dom bangsa VN ye dom kadha daoh pok meyaom bruk ngak mbang meblah hu sa labik dang biak praong. Dom panuac daoh mộc mạc, giản dị min ndung bak biak ralo hatung hatai di bhap bini. Dalam danak dak papar sap harei ini likau payua tal mikva saong taong abih dom kadha daoh bhap bini di dom bangsa takik ndom ka bruk ini. Daok urak ini, daa mikva saong taong abih gauk pang khau tin ilamu.

Khau tin ilamu

 # Jabat QH pambuak bruk saong hội nhạc sĩ VN barau peih bruk pataom iek veik saong jao giải bruk jak ba paneh kadha daoh salam uan bruk pahadar 70 thun harei tổng tuyển cử akaok meti pilih ruaj urang ka QH. Hadei di dua mbang peih tabiak, mban peih bruk taduan hu 99 kadha daoh di 87 nhạc sĩ chuyên saong oh chuyên di dom tỉnh, ban dalam taneh ia payua mai. Tui nan, mban peih bruk hu jao giải sa ka tác phẩm “QH hadah tanyak hatai jia” di nhạc sĩ Vũ Đức Tạo; jao 2 giải dua ka tác phẩm “Hadah hadai QH VN” di nhạc sĩ Ngô Quang Dũng saong “Hadar tal Y Ngông Niek Đam” di nhạc sĩ Vũ Mão.

 2/ Meng harei 15 tal harei 23/11 tal, di palei ilamu – DL dom bangsa VN daok di Đồng Mô, HN hu peih adit jum pataom dom bangsa – inem krung ilamu VN. Adit ilamu hu 150 bhap bini dom bangsa Thái, Khơ Mú, Tà Ôi, Chăm, M’nông, Sán Chay, Hoa, Khmer, Kinh  hu mbaok tame. Dalam 9 harei peih adit ilamu hu rah tabiak dom bruk ngak yau: parang iek, pandap mbang, padang veik dom rija roya di bhap bini bangsa takik.

3/ Di sang bac ĐH Bách Khoa Đà Nẵng, kapul inem krung ilamu VN pambuak bruk saong miuyim điêu khắc Chăm barau peih parang iek bruk pakacah thaot binguk inem krung VN 2015. Parang iek hu parang tabiak 100 blah thaot hu palih ruah meng 4.740 blah di 537 tác giả dalam saong langiu taneh ia. Parang iek jeng daok hu peih tabiak di ban raya HCM saong HN meng ini tal harei 12/3/2016.

 

4/ DL ilamu saong roh duah daok lac bruk di dam dara urang ranaih umo. Janih DL ini ba mai dom trải nghiệm barau, brei thau jang ka ilamu bangsa, gam pasram megru kỹ năng “mềm” ka rai diuk. Palei Bana daok di Đắc Rơwa, ban sit Kon Tum, tỉnh Kon Tum lac sa dalam dom labik piah tuai damuai peih sa tour yau nan. Dom baoh sang daok angaok mbon maong trun kraong Đăk Bla gheih mekre hu peih pabah mbang taduan rok tuai damuai atah jaik. 

 

5/ Ngan saong urang Ê Đê saong rilo bangsa takik karei di Tây Nguyên, alak cần lac sa janih ia menyum oh kurang hu dalam dom rija roya atau tuk taduan rok tuai quý. Harei ini, oh lac ia menyum ta-eng di puk palei, alak cần hu jeng đặc sản hu hương vị ceik glai, lac pandap alin hu yaom ngan saong tuai damuai tuk mai tal Tây Nguyên.

 

 

6/ Di tukvak 20 tuk harei 12/11 tal, di sang daoh papar binguk ban raya HCM hu rah tabiak danak dak “Salih ka panuac khin ndom”  ngan saong kadha “kraong”. Dom bruk oh var hu ngan saong dom kadha daoh ka kraong hu ba tabiak daoh yau Chảy đi sông ơi, Trở về dòng sông tuổi thơ, Sông quê, Ngẫu hứng sông Hồng, Hát với dòng sông…   Danak dak hu mbaok dom ca sĩ yau: Cẩm Vân, Nhật Hạ, Nghệ sĩ ưu tú  Thanh Thúy, Thuỳ Dương… hu papar binguk tapak angaok kênh HTV9./.

 

Kadha daoh chăm: vì màu xanh quê hương

 

Pathau mikva saong taong abih gauk! Dalam tuk ngak bruk, mbang ngui daok dang yaok harei, urang chăm hu paneh tabiak dom ragu daoh bhap bini ndom tagok dom rup binguk biak jaik yau nao tasik, trah jan, caik halam, vah gaiy, tam padai… pandar piah duh ka dom adat cambat – rija roya saong brei ka rai diuk ilamu di drei.

 

Ragu daoh khang kadang, panuac daoh brei mboh bruk chreih chrai ngak bruk, ndung bak makna pok meyaom urang nao tasik khik caga chủ quyền tasik pulao palei negar tuk halei jeng ba mai ka urang pang mboh drut drui saong mboh hu bruk takre ngak, anit ranam tasik. Nan lac kadha daoh bhap bini Chăm “Mek jan” kayua Quốc Khánh daoh. Daa mikva saong taong abih gauk tui pang:

( kadha daoh “Lý vãi chài” - 3’12)

 

Kol drei barau pang kadha daoh “mek jan” kayua Quốc Khánh daoh.

Pathau mikva saong taong abih gauk!

Piah hu padai, brah raong diuk anek menuac ye urang nông njauk glaih glar dang di pandiak, riak di hajan. Dalam tuk ngak bruk urang bhian nyim panuac daoh, sap takơ piah pacadu dom gaih glar. Dalam dom ragu daoh bhap bini di dom bangsa takik ye bruk ngak tabiak asar padai hu vak tagok jeng ralo kadha daoh yau tam padai, paik njam, nao yuak padai… Urak ini, kol drei yaom pang kadha daoh bhap bini Chăm Paik njam, kayua kapul urang kamei daoh.

( kadha daoh: Hái rau 3’23)

 

Meng bloh nan lac kadha daoh bhap bini Chăm “paik njam” kayua kapul urang kamei daoh. Patui danak dak, lac kadha daoh “hái cấy” ragu daoh bhap bini Tày, kayua nghệ sĩ Thanh Hoa saong kapul urang kamei daoh, daa mikva saong taong abih gauk tui pang:

 

( Hái cấy 2’10)

 

Mikva saong taong abih gauk barau pang kadha daoh “hái cấy” sa ragu daoh bhap bini Tày, kayua nghệ sĩ Thanh Hoa saong kapul urang kamei daoh. Patui danak dak, lac kadha daoh “nao yuak padai”, sa ragu daoh bhap bini H’rê. Meng ragu chreih chrai, kadha daoh yau brei mboh bruk bui sambai di bhap bini tuk padai sraoh, tasak kanyik, trak asar hu ba mai rai diuk trei sil ka puk palei. Kol drei pang nghệ sĩ Hương Loan daoh kadha daoh ini:

( kadha daoh Hrê Đi cắt lúa 2’0)

 

Pathau mikva saong taong abih gauk!

Jeng yau bangsa Hre, dom bangsa karei jeng hu kadha daoh ndom ka bruk bui sambai di yaok urang tuk pala drak njauk. Kadha daoh “bilan yuak”, ragu daoh bhap bini J’rai jeng lac sa kadha daoh yau nan. Daa mikva saong taong abih gauk pang nghệ sĩ ưu tú Thu Năm saong kapul urang kamei daoh:

( kadha daoh Mùa gặt 2’30)

 

Pathau mikva saong taong abih gauk! Oh lac hu bruk ngak nông meng hu mboh dalam ragu daoh bhap bini bo bruk jhik, pet di urang kamei bangsa takik jeng hu ndom tal tapa kadha daoh bhap bini Giáy hu angan “jhik takhaok”. Ttapa panuac daoh mộc mạc saong lai li-ar, urang pang meda mboh lac urang payua hatai anit ranam di drei tame bruk jhik, bruk pet.

( kadha daoh Khâu giày 2’30)

 

Pathau mikva saong taong abih gauk! Kadha daoh “jhik takhaok”, ragu daoh bhap bini Giáy tapa sap daoh di nghệ sĩ Tô Minh Phúc meng bloh nan likau tamat harak ilamu harei adit yaih khan dom ragu daoh bhap bini di dom bangsa takik ngan saong kadha “daoh ka bruk ngak mbang pala drak”. Salam kajap kalo salamat./.

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân