Tal harei ini, mikva hu pataom gauk trun pajaih

Dalam chreih chai bui sambai di dom harei akaok thun bahrau, urang nong huyện Ninh Sơn tabiak hamu mong iek phun pala, athur raong, caong khin sa thun mek hu rilo padai brah, phun pala that siam, rai diuk dak harei dak ginup, dak trei sil. Meng page mesup, dom mblang hamu chreih chrai tagok haong bruk rilo urang nong tabiak buh khak, ngak ar, urang kaoh hareik ka limo, kubao, pabe... tuk pandap mbang khik piah dahlau Tết abih blaoh.

Di dom mblang taneh pala phun lavik thun saong njam patam xã Nhơn Sơn, mikva jeng chreih chrai tabiak hamu akaok thun bahrau. Bui sambai kayua thun ini phun medar hu rilo baoh saong pablei hu yaom, sa-ai Nguyễn Thị Gái, daok di palei Lương Cang, khan lac: Mbang Tết blaoh, sang dahlak tabiak bein paik medar, kayua njauk tuk tết nan ye medar hu yaom, pablei di bein labaih 15 ribau đồng/kg, akaok thun bahrau sang paik hu rilo baoh.

Tui bruk ba tabiak, bilan đông-xuân 2020-2021, mblang taneh pala drak dalam huyện Ninh Sơn labaih 6.000ha. Tal harei ini, mikva hu pataom gauk trun pajaih, ngak ka nyu salah blaoh yaok labik tui njauk tukvak pala drak hu ba tabiak blaoh piah patrun patakik halak halin, tapa nan ngak brei patagok năng suất, chất lượng phun pala.

Jeng meng page mesup harei 4 bingun Tết, meng xã An Hải tapa bal sit  Phước Dân saong dom xã Phước Thuận, Phước Hậu, Phước Thái (huyện Ninh Phước), angaok dom mblang hamu padai saong bein nho, medar, rilo urang nong tabiak mblang hamu ngak bruk. Amuk Phạm Thị Lưu Hường, daok di khu phố 8, hu labaih 1 sào meteh pala njam puan saong akaok lasun prang, gam buac hareik gam brei thau, yaom lac Tết min amuk jeng takre tabiak hamu ngak bruk kayua nyu randap paje. Di palei Đá Trắng (xã Phước Thái), sa-ai Nguyễn Văn Hải daok pruh jru pacang caga phun pala ka phun padai brei thau: Dahlak hu labaih 1 ha padai, bilan đông – xuân ini pala hu labaih 1 bilan paje, padeih mbang Tết blaoh, page mesup ini dahlak tabiak hamu ngak paje.  

Sa-ai Nguyễn Văn Tài, daok di palei Phước Khánh (xã Phước Thuận) pala 2 sào nho, 1 sào taneh pala hareik saong njam patam, saong daok hu van raong palamek 25 drei pabe brei thau: langiu di bruk pandar hala nho, hareik di puh sang drei, padeih mbang Tết blaoh ye nduac nao blei hala nho, hala medar di dom bein karei piah ka pabe mbang. Tui sa-ai, dahlau di Tết, kayua covid-19 nan ye pabe oh pablei hu saong nho jeng oh hu yaom, min urak ini mboh bui sambai kayua yaom nho daok tagok saong sa-ai jeng caong khin bruk blei  ralaow pabe jeng hu siam veik yau dahlau diah.

Gam haong urang nong, urang taong ikan dalam tỉnh jeng hu nao tabiak tasik akaok thun bahrau, haong hatai caong khin angin siam riyak lagaih, taong mek hu rilo kaya ikan. Di dom xã tapen tasik yau Cà Ná, Phước Diêm, Phước Dinh, thun ini yaom lac oh peih bruk pakacah ghe gilai meng kan di harei 3 bingun Tết, min lac adat cambat tanarakun meng kan mai, mikva urang taong ikan jeng peih bruk kakuh Yang Nam Hải caong hu  Yang tasik pacang khik, taong mek ikan hu mbuan laghaih jang, ghe gilai tuk halei jeng bak hadang ikan. Dom sruh gilai taong ikan praong ba gauk tabiak tasik, dom sruh ghe gilai taong mek jaik ar jeng tabiak tasik akaok thun piah duah riski meng tasik.

  Rilo janih kaya ikan hu urang blei, pajeng tal dom darak pasak bal pablei veik haong yaom biak glaong, yau jantak dom janih yaom meng 80-320 ribau đồng/kg; ikan hố 120 ribau  đồng/kg; ikan sòng sit 70 ribau đồng/kg, ikan ngân prong 150 ribau đồng/kg; dom janih ikan prong yau ikan mú, ikan bóp…yaom meng 170-220 ribau đồng/kg… Sang ong Nguyễn Văn Tùng daok di palei Sơn Hải 1, xã Phước Dinh brei thau: meng harei 3 bingun Tết, rilo sang hu caga pandap taong ikan saong pandap piah ngak adat cầu ngư, caga blaoh blai ka bilan taong mek bahrau ngan haong hatai caong khin mek hu rilo ikan hadang. Hu sang nao tasik meng harei 2 bingun Tết mek hu jaik pluh tạ ikan. Tui mong mboh di khaol dahlak, hadei di tuk ngak adat “peih bambang tasik”, urang taong ikan Thuận Nam hu ba gauk tabiak tasik, tame sa bilan nao tasik bahrau./.

Urang lang: Jasi – 18/02

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân