Bộ Tư lệnh Quân khu 7 mai rivang labik daok jaik taphia bilai khik iek bhum tapen daok di xã Thái Bình Trung, huyện Vĩnh Hưng 

Harei tết di bhum tapen negar Tây Nam, pandiak khang saong thu lagu, min dalam dom baoh sang di “Labik daok bhap bani jaik taphia balai khik iek tapen negar” xã Thái Bình Trung biak lai la-ar, anak dom baoh sang bingu jeng daok raak hadah. Ngan haong 20 baoh sang daok pak ini, tết akaok mereip di bhum tapen negar biak bui sambai saong trei sil kayu alac hu sang danaok khang kajap, puk paga siam hatian saong bahrau yuak blaoh padai, pala njauk saong pablei hu yaom.

Yau dom baoh sang karei, tuk mai daok pak ini, sang sa-ai  Nguyễn Thị Kiếm hu Bộ Tư lệnh Quân khu 7 haong dom gah chức năng di tỉnh Long An daong hu 170 triệu đồng piah padang ngak sang saong grap tanat bruk ngak mbang. Gam haong jien patak pataom hu, sa-ai padang baoh sang khang kajap labaih sa tỷ đồng, blei jamriak piah ngak 2 hecta hamu anak sang. Tết ini, bingu anak sang raak mekre, dalam sang hu har, mứt, ralaow, ikan oh kurang hagait, bo daok hu njam hijao di dom urang lin di balai khik iek vaih tame blei, sa-ai Kiếm mboh sa thun bahrau hu biak ginup: “Pak ini jalan nao mai mbuan laghaih. Dahlau daih nao hamu nao meng ghe, meng ghe blaoh ba pandap tagok hamu. Daok urak ini tame ini, hamu daok di anak sang, ngak gam jalan nao tabiak hamu, pajeng ba pandap tabiak hamu biak mbuan laghaih jang. Pak ini hu Karja saong dom gah sangka tal, bui sambai rilo!”

Sang sa-ai Nguyễn Văn Phường tok hu meteh hecta hamu daok jaik jalan tapen negar min jeng hu tani tanat labik daok, tani tanat bruk ngak mbang. Dahlau di tết sa-ai yuak hu jaik 3 tấn padai, pablei hu yaom labaih 6 ribhau đồng sa kí. Sa-ai Phường bui sambai brei thau: Nao daok di tapen negar, sang danaok hu padang ngak siam mekre, hu pablei salih sit sot di sang, duah ginup jien cai pandar yaok harei, jien mek tame hu meng padai ye caik pataom nan ye hu tani tanat jang biak rilo: “Dahlau tết hu bilan padai labaih hu 6-7 triệu, cai tết hu paje. Tết ini jeng grap tanat, bui sambai. Tagok ini ngak mbang, pablei salih mbuan jang daok dalam diah. Thei jeng thau sahneng, gam haong balai khik iek bhum tapen negar.”

Taong abih 20 baoh sang di labik ini, sang halei jeng uan raok tết tapen negar mbang camereip abih biak bui sambai, chreih chai. Daok ngan haong dom urang lin di balai khik iek Thái Bình Trung ini, oh hu tết thun halei bui sambai yau thun ini. Sa-ai Trần Văn A Lai, sa urang lin di balai khik iek ini khan lac, hu dom baoh sang di mikva tagok ini daok, urang lin haong bhap bini padang balai khik iek, daong pacadu bruk uan sang saong mboh sahanag hatai jang dalam dom harei tết: “Thun ini mbang tết haong mikva biak bui sambai. Raidiuk pak ini jeng sambai, chreih chai. Dahlau diah oh hu bhap bani daok pak ini ye bruk nao pasang iek biak kan kandah kayua jalan tapen negar atah jang, jalan nao mai mbuan kayua jalan sit biak rilo. Meng tuk hu bhap daok pak ini hu bruk hagait ye mikva khan brei thau chip.”

Bhian di nyu dom labik daok di bhap bani jaik taphia jalan tapen negar tok hu 5 tal 10 atau 15 baoh sang. Min di xã Thái Bình Trung, huyện Vĩnh Hưng, dom baoh sang hu hamu jaik taphia jalan negar biak rilo, bruk peih prong labik daok di bhap bani hu daong tani tanat jang rai diuk di bhap bani. Tal harei ini taong abih 20 baoh sang thei jeng hu sang danaok khang kajap, điện aia ginup abih, jalan mbak nao mai mbuan laghaih. Amuk Trần Thị Yến, Bí thư- Chủ tịch UBND xã Thái Bình Trung, huyện Vĩnh Hưng, tỉnh Long An brei thau: “Mikva thei jeng bui sambai, chreih chai. Daok puk palei jeng sahanang hatai jang tuk jalan tapen negar di drei hu bhap bani daok, hu bruk hagait ye mikva samar khan brei thau. Meng tuk bhap bani tagok daok ye palei yau hu pabak manuac urang khik iek jalan tapen negar, daong ka dom gah quân sự, công an, biên phòng.”

Kuhria tal abih thun 2020, di Long An, Tây Ninh, Bình Phước, Bộ Tư lệnh Quân khu 7 saong dom palei hu padang 34 labik daok jaik taphia haong balai bol lin tapen negar ngan haong 170 baoh sang gam haong hạ tầng piah duh ka bhap bani di labik daok. Quân ủy Trung ương, Mentri Quốc phòng taong yaom glaong bruk ngak ini, mong ini yau jalan peih ngak Sarak 33 di Bộ Chính trị ka "Jalan khik caga bhum tapen negar", nan lac bruk ngak njauk pambak prong dalam tukvak anak tal. Thiếu tướng Nguyễn Trường Thắng, Tư lệnh Quân khu 7 lac: “Jalan tapen negar kol drei yau nan, khaol drei njauk hu rilo danak dak sangka tal bhap bani, camereip nan lac bhap bani di tapen negar. Jalan ngak di khaol drei lac dak harei dak hu rilo jang bhap bani daok di tapen negar, yaok bhap bani lac sa prein khang daong pabak tame bruk khik caga jalan tapen negar di taneh ia”

Anak tal, dom labik daok jaik taphia balai khik iek  jalan tapen daok hu padang ngak, daok hu rilo baoh sang khang kajap, rilo labik daok khang kajap ka bhap bini di jalan tapen negar yau Labik daok jaik taphia balai Thái Bình Trung, huyện Vĩnh Hưng, tỉnh Long An. Di labik nan, bruk sron mbon saong rai diuk trei sil daok hu mboh. Bhum tapen negar mboh biak jaik saong tuk halei jeng bak bui sambai chreih chrai di bilan akaok thun bahrau./.

Urang lang: Jasi – 17/02

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân