Urang ngak bruk gah Y tế brei klauk jru vaccine dahlau 

 

Harei 26/2, Rajaei tabiak Sarak 21/NQ-CP ka bruk blei saong pandar vaccine pacang Covid-19. Sarak hu ndom cambaic, Rajaei jao ka Mentri Y tế  dang tabiak, pambuak bruk saong dom mentri, jabat, tỉnh ban hu pambuak tal peih bruk blei meng negar langiu tame, taduan bruk daong, khik saong pandar vaccine pacang caga Covid-19 dalam thun 2021 ka urang umo meng 18 thun tagok. Tui kuhria lac labaih 150 triệu mbang vaccine. Iek tui bruk pabak vaccine, brei klauk jru dahlau ka dom urang ngak bruk gah pacang caga jit, urang daok di bhum hu jit.

UB bhap bini tỉnh Bình Thuận hu harak ieu dom gah dalam tỉnh patagok bruk khik iek gilai, pacang padam pui khuah gilai dalam tukvak tabung glaong dalam bilan thu thun 2021. Abih di nyu nan lac meda langyah njauk tui hukum ngan haong dom urang khin ngak khuah gilai, palai pajoa gilai. Tui khau tin kakei bruk khuah gilai di Cục khik iek gilai, urak ni di tỉnh Bình Thuận hu rilo harei oh hu hajan, langik thu lagu dui atah, abih di nyu nan lac labik dom huyện Tuy Phong, Bắc Bình, Hàm Thuận Nam mbuan khuah gilai pakat V (lac pakak biak mbuan si khuah di abih).

Sở jalan mbak pajeng ba ban raya HCM brei thau, dom labik pato pakai mek harak adat peih radaih daok peih pato saong tut angan pakacah piah pabak harak adat peih radaih ka urang bac meng harei 1-3. Lingiu di nan, Sở hu panuac ieu dom labik pato peih radaih brei khan ka taong abih urang bac mai meng bhum hu jit, atau hu nao tal bhum hu jit njauk pathau khan haong dom labik y tế palei piah hu pasang iek prein yava. Taong abih jalan ngak tui njauk tacei pato di pasak pasang iek ruak kik ban raya. Gam haong nan, peih bruk pathau khan y tế di mangaok online yaok harei ka taong abih dom urang bac, urang ngak bruk. Urang pathau khan oh njauk, oh biak meda njauk langyah tui hukum. 

Ong Huỳnh Anh Tuấn, akaok Công đoàn dom labik chế xuất, labik ngak kong ban raya Hồ Chí Minh, brei thau lac dom urang ngak mai ngak bruk gilac  hadei di tuk Tết hu labaih 97%. Dalam tuk rok urang mai ngak bruk gilac, dom doanh nghiệp hu peih tabiak dom jalan khik salamat ka prein yava yau ye: peih bruk pathau khan y tế, dut iek rup pabhap, pruh jru pametai anek ruak sang xưởng, ieu kakei cuk pataik pacang pabah; urang ngak mai meng bhum hu jit njauk hu harak brei thau cambaih di labik y tế saong ngak njauk tui bruk brei daok karei.

CA tỉnh Đồng Nai brei thau, dalam bruk ngak tabiak, pablei salih labaih 200 triệu lít xăng menyek ja bahrau hu taong tayah, CA tỉnh bahrau chap mek veik 2 kapal gilai praong 3.000 tấn. 2 kapal gilai nan, lac kapal Nhật Minh 07 haong gilai Nhật Minh 09, yaok sruh pajeng hu 1.500 tấn. Dua baoh kapal gilai ini hu kol ngak xang menyek ja pandar piah pajeng ba, njuk mek yaok triệu lít xăng menyek lậu dalam bruk ngak xang menyek ja nan. Gah chức năng hu khởi tố pabak tame veikg 3 urang, lac 2 urang peih kapal haong 1 thợ máy.

Tui gah Di dân dunya (IOM) saong Cao ủy Liên hợp quốc ka urang tị nạn (UNHCR) brei thau, 41 urang di cư metai mblung ia di tasik Li-bi (Libya) kayua karam gilai. Tui panuac khan di 77 urang di cư hu sa sruh gilai pablei salih sraong tagok, hu abih tih 120 urang, dalam nan hu 6 urang kumei saong 4 uranaih, tabiak truh Li-bi harei 18/2. Yaok urang njauk biyar ka po gilai labaih 1 ribau đô la Mỹ piah pajeng nao tal châu Âu. Min, ni lac sruh gilai oh hu pandap panda khik salamat,  po gilai pajeng biak rilo yau nan ye bhian rahtabiak bala. Tui pathau khan di Cao ủy Liên hợp quốc ka manuac tị nạn, meng akaok thun tal urak ni hu labaih 160 urang metai di Trung Địa Trung Hải, dalam tuk hu labaih 3 ribau 5 rituh urang karei hu sraong daong mai veik Li-bi.

Di negar Prang, meng ini tal puac bilan 3 tal, 2 dalam 3 dom menuac umo labaih 75 thun hu klauk caga Covid-19. Akaok bilan 4, dom menuac umo labaih 65 thun hu klauk vắc xin, dalam tuk meng ini mbiah tal kreh bilan 5, negar Prang meda klauk caga ka rahra umo labaih 50 thun. Bruk daong pamaong tal di rajaei Prang lac ngak taong abih piah ngak brei suai veik tukvak pacang cakak negar mbang ka 3, bruk bo taneh ia ini dahlau diah tabiak panuac lac ngak abih janih piah plaih.

Mbang ginum biaai pakat glaong tapa online di dom urang par akaok Liên minh châu Âu (EU) hu peih tabiak dalam 2 harei 25 saong 26/2 ngan haong dom bruk ngak praong ndem tal jalan ngak piah pacang caga jit praong Covid-19. Mbang ginum biai hu peih tabiak tuk bhap bini châu Âu daok caong maong rajaei dom negar njauk hu jalan langyah jhul patagok bruk klauk jru, mbang ginum biai hu brei thau lac sa kein laba piah ka dom urang par akaok châu Âu langyah dom bruk vắc-xin di dalam kapul, patakik bruk nao mai di bhap bini, khik ginup bruk pablei salih pandap panda saong dịch vụ dalam bilan jit ruak. Dom urang par akaok negar châu Âu sanya lac meda jhul samar bruk brei adat pandar rai vắc-xin ka dua meda tabiak rai di bilan thu anak tal, abih di nyu nan lac janih vắc-xin meda pamaong tame dom biến thể bahrau./.

Urang lang: Thu Thảo – A.Nghiêm 27/02/2021

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân