Thun 2021 ini, tỉnh Vĩnh Long hu jao brei palih ruah labaih 1.100 urang lin birau ka dom tapon nyaom bol pan phao karaong. Mbiah tal urak ini, bruk palih ruah bhap bini tame ngak bol lin di tỉnh Vĩnh Long hu salah blaoh, taong abih dom bhap bini hu iew tagok jalan jeng hu mbaok di sang, cang tal harei tagok jalan peih tabiak  di harei 3/3 anak tal. Đại tá Vạn Tuấn Hưng, Phó tham mưu trưởng, Bộ chỉ huy quân sự tỉnh Vĩnh Long brei thau, thun ini kayua kan kandah di jit Covid-19  nan ye bruk jao saong taduan urang lin peih ngak dalam sami samar, takik brei bhap bini mai hu mbaok.

73 urang di Hà Nội saong Long An hu mbaoh tame klauk iek Nanocovax tukvak dua di dah page 26/2. Nanocovax lac vaccine Covid-19 kayua Công ty Nanogen roh duah, ngak tabiak. Vaccine hu ba tame klauk iek meng 17/12/2020, tal urak ni hu tamat tukvak ka sa, daok ngak tukvak ka dua. Trung tướng, giáo sư Đỗ Quyết, Giám đốc Học viện Quân y, Mintri Quốc phòng brei thau lac, tapa ngak iek tukvak ka sa brei mboh vaccine Nanocovax salamat, oh hu bruk hagait trak, hu prein pacang caga ruak

Labik định cư 119 palei Hai Căn, xã Phú Nghĩa di huyện taphia negar Bù Gia Mập, tỉnh Bình Phước ralo meng hu dom baoh sang kan kandah, bhap bini bangsa takik kan thaot.  Dahlau diah, taong abih dom baoh sang nan raidiuk kan kandah, oh hu taneh ngak mbang pala drak, bruk ngak oh tani tanat. Anak bruk nan, piah bhap bini tani tanat raidiuk, huyện Bù Gia Mập pambuak saong Kapol Kinh tế -QP 778 di QK 7 kham jak ba urang rik jien tame padang ngak dom baoh sang “ caong khin”, ba dom baoh sang bhap bini mai daok. Labaih 6 thun tapa, Labik định cư 119 hu bak sambo hijao di phun pala, hu gom điện truac hadah, jalan bê tông praong, tapak, sang bac ka ranaih sit…ngak brei hadah hadai tagok bhum taneh kan kathaot dahlau diah.

  Sở jalan mbak pajeng ba ban raya HCM brei thau, dom labik pato pakai mek harak adat peih radaih daok peih pato saong tut angan pakacah piah pabak harak adat peih radaih ka urang bac meng harei 1-3. Taong abih dom urang bac mai meng bhum hu jit, atau hu nao tal bhum hu jit njauk pathau khan haong dom labik y tế bhum palei piah hu pasang iek prein yava, gam tui di nan, peih bruk pathau khan y tế di mangaok online yaok harei ka taong abih dom urang bac, urang ngak bruk. Urang pathau khan oh njauk, oh biak meda njauk langyah tui hukum, Taong abih dom jalan ngak tui pato tacei di pasak pasang iek ruak kik di ban raya.

Harei 27 haong harei 28.2.2021, huyện Tây Giang, tỉnh Quảng Nam peih ngak adat Peih mbaok thun dhar phor glai di palei sinh thái inem krung Pơmu, xã A Xan. Ini lac thun ka 4 adat nan hu huyện Tây Giang peih ngak. Thun ini kayua jit Covid-19 nan ye huyện tok peih ngak adat, oh peih bruk me-in sambai. Binah adat hu peih ngak dom adat pambuak tal adat kakuh yang glai tui ilamu meng kan di bhap bini Cơ Tu yau ye adat padang phun nêu, adat cúng peh mbaok thun dhar phor glai. Adat peih mbaok thun dhar phor glai lac bruk ndung bak hatung hatian hu urang Cơ Tu pak ini khik ramik meng dom saman ini mai, brei mboh veik ilamu meng kan di bhap bini Cơ Tu saong hu makna biak praong dalam bruk pok meyaom, pachreih bruk khik glai di bhap bini bhum ceik.

Viện Y tế pakat negar Mỹ  bahrau brei thau sa hatai sahneng bahrau piah duah thau dom kan kandah suai lavik di bruk njom mbak vi rút SarsCoV-2 saong dom pandap panda pacang caga, jalan taong ruak dom urang ruak caik veik di chứng. Yam ndok Viện Y tế pakat negar Mỹ, Francis CollinsI brei thau, dom urang mboh dom triệu chứng tamuh tabiak hadei di tuk njom mbak atau patagok tui tukvak, dom kan kandah ni ieu lac Di chứng cấp tính hadei di njom Sars CoV-2. Urak ni ka oh thau cambaih hu tanut trak damak di bruk ni, min ngan haong dom urang di yaok umo thun njauk njom blaoh atau meda njom vi rút meda ngak kan kandah praong tal prein yava di rahra.

Thun 2020 lac thun akaok meti Hàn Quốc dang anak bruk patrun rahra kayua dom menuac metai rilo jang dom uraniah hu ndih tapui tabiak. Kuhria dalam 3 thun meng thun 2017, dom anek kamar tabiak dunya yaok thun trun daok takik, meng 400.000 trun daok oh ka tal 300.000 uraniah. Dalam tuk nan, dom menuac metai dalam thun 2020 lac 305.000 urang. Bruk nan anak tal jeng mboh lac oh ka hu siam tagok. Hu panuac duh hatai lac bruk trun ini meda samar jang dalam tuk rilo dam dara padeih veik bruk ngak likhah atau padeih ndih tapui kayua jit COVID-19.

Ban Brisbane di Australia hu yam tapa rilo labik karei di châu Âu saong châu Á piah jeng sa labik hu pasang iek brei peih ngak Thế vận hội Olympic meda hu peih tabiak di bilan Hè thun 2032. Mayah hu pilih ruah ngal labik peih Thế vận hội 2032, Brisbane meda lac ban ka 3 di Australia dang tabiak peih ngak bruk hu makna praong ni, hadei di ban Melbourne thun 1956 saong Sydney di thun 2000. Tui kuhria, Thế vận hội 2032 meda hu peih tabiak dalam tukvak labaih 2 adit, meng harei 23/7 tal harei 8/8/2032./.

Urang lang: Thu Thảo – A.Nghiêm -27/02/2021

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân