Pasak Kuhria mboh dahlau bruk langik tasik pakat negar brei thau bruk pandiak bhang, njom ia mbak di bhum Pei negar meda catang dalam bilan 2 saong dui atah tal akok bilan 3, hadei di nan trun meneing. Bruk njom ia mbak di bhum taneran kraong Cuu Long thun ini pambak tame halau ia meng gah angaok kraong Mekong, ia ndik tagok saong daok rilo salih karei dalam tukvak anak tal. Dom bhum palei di bhum taneran gah Meraong negar njuak duah thau sumu ka bruk  kuhria mboh dahlau piah hu dom jalan pacang caga pandiak bhang, njom ia mbak.

Piah khik siam ka bruk pacang caga jit Covid-19, ban raya HCM oh brei peih harei roya Tết Nguyên tiêu thun ni di Quận 5. Ni lac mbang ka 2 harei roya ni oh hu peih tabiak kayua njauk kan kandah di jit Covid -19. Dahlau di nan, di bilan 7/2020, harei roya Tết Nguyên tiêu di urang lo daok di quận 5 ban raya HCM hu brei angan lac inum krung oh maong mboh pakat negar. Gam haong nan, bruk ni jeng hu ba tame angan 10 bruk ilamo, harei roya praong yaok thun di ban raya HCM. Yaom lac biak damen min tui ong Nguyễn Võ Xuân Kỳ - Phó akaok UBND Quận 5, rajaei saong bhap bini Quận 5 biak pachreih tui bruk ngak ni di UBND TP. 

Tukvak tapa, Kadung jien Pacang caga jit Covid-19 Ban raya HCM taduan hu jaik 175,8 tỷ đồng saong 82, 6 tỷ đồng jien blei pandap,jamraih  di bhap bini dalam saong langiu negar, dom kapol nyaom xã hội rik tame. Mneg kadung jien nan, Ban raya parabha  labaih 86 tỷ đồng jien saong pandap, jamraih taduan hu ka dom đơn vị ngak bruk pacang caga jit Covid-19 di Ban raya HCM; daong tỉnh Hải Dương 2 tỷ đồng; alin 1 tỷ đồng ka dom đơn vị  Bol lin Biên phòng, bol bala saong dom gah karei ngak bruk pasang iek, khik pacang caga jit di bhum taphia negar. Tui kuhria dahlau, Mban jak ba taduan hu saong parabha kadung jien nan brei buh tabiak labaih 22,6 tỷ đồng piah blei jamriah y tế jeng yau daong dom đơn vị y tế daok ngak bruk pacang caga jit Covid-19.

Urak ni, di huyện Cẩm Mỹ (Đồng Nai) daok hu yaok rituh tấn kruac bung tal bilan paik baoh min ka oh pablei hu kayua njauk kan kandah di jit Covid-19. Rilo bein, baoh kruac bung tathak abih min ka oh hu menuac blei, urang nong mbuan lahik abih saong kan kandah tal năng suất mbang hadei. Piah daong ka urang nong pablei hu baoh kruac bung, UBND huyện Cẩm Mỹ, Viện ilamu ngak nong gah maraong, Công đoàn khối cơ sở di mintri ngak nong saong patagok palei pala, Kapul khik caga langik tasik saong alam Việt Nam, Báo ngak nong Viet Nam haong Rayo papar binguk VTC hu pambuak gauk peih bruk  daong ka baoh kruac bung di huyện Cẩm Mỹ (Đồng Nai), ngan haong yaom 15.000 đồng/kg. Tui kuhria, danak dak  daong nan hu peih tabiak di dom harei anak tal kayua baoh kruac bung daok biak rilo. Ni lac sa bruk daong ka urang nong, oh lac bruk duah laba.

Piah parilo bruk ngak pabak ka bruk bac bruk ngak di urang ngak, Ninh Thuận hu padang angan pato bruk ngak ka urang ngak di palei pala hu 192 bruk ngak, dalam nan hu 110 bruk ngak nong, 9 bruk langiu ngak nong, 24 bruk pablei salih dịch vụ, 14 bruk tiểu thủ công nghiệp, 35 bruk ngak karei tui bhum palei. Langiu di nan, tỉnh hu 21 labik pato bruk ngak patao pasram 17 bruk ngak pakat cao đẳng, 10 bruk ngak pakat trung cấp, 187 bruk ngak pakat sơ cấp saong pato bruk ngak ala 3 bilan, ngan saong 9.000 urang hu pato pasram yaok thun.

Truyền thông Mỹ harei 25/02 brei thau bol lin Mỹ meng angaok langik taong trun sa labik di kapul dân quân kayua Iran daong di Xi-ri (Syria). Bruk ngak ni piah cagar veik bruk taong meng rốc-két (rocket) pamaong tal dom kapul Mỹ pak ni di dalam dua adit tapa. Bruk taong mmeng angaok langik trun ini lac bruk  quân sự camriep abih di Tổng thống Giâu Bai-đừn (Joe Biden) meng di tuk tagok rai di puac bilan 01. Bruk taong nan di bol lin Mỹ yau piah ngak brei ka urang mboh huac, blaoh patrun dom bruk taong di anak tal pamaong tame kapul di Mỹ.

  Urang pan akaok ban Paris hu panuac likau Rajaei brei pacang cakak ban ine taneh ia Prang dalm 3 adit gam, salih ka bruk pacang cakak  di dom harei puac adit yau di tỉnh Alpes-Maritimes atau tỉnh Nord meng blaoh. Kadha nan hu ba tabiak hadei di dom mon tuk Thủ tướng Prang Jean Castex tabiak panuac brei pasang iek catang jit rual di 20 tỉnh, dalam nan hu ban ine Paris. Dalam 20 tỉnh hu pakhang bruk tui iek, ralo labik lac daok dalam ban ine Paris saong dom tỉnh jaik taphia, labik hu urang njom virut dalam dom harei tapa tal tabung glaong, tui nan dom biến thể mai meng Anh, Nam Phi atau Brazil meblah tal meteh dalam dom urang ruak.

Braxin daok tame sa tukvak bahrau di jit praong Covid-19 ngan haong dom biến chủng bahrau di virus Sars CoV-2 mbuan njom mbak glaong jang tal 3 mbang. Ni lac panuac brei thau di harei kabroi di akaok mintri Y tế Braxin Ê-đu-ác-đô Pa-du-en-lô (Eduardo Pazuello) dalam tuk negar ni hu 250 ribau urang metai kayua Covid-19. Tui akaok mintri Y te Pa-du-en-lô, rajaei hu parabha meng 13 tal 14 triệu vắc-xin saong tui daok kuhria klauk ka meteh dalam 210 triệu rahra negar ni di kreih thun ni. Braxin daok ginum biai piah blei dom janih vắc-xin bo negar ni meda blei hu./.

Urang lang: Thu Thảo -A.Nghiêm - 26/2/2021 10:29:33

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân