Rilo puk palei ba bruk ngak ka urang palei pala duah hu jien mek tame 

Menek tabiak saong prong tagok di Cao Bằng, Vy Văn Quân – Bangsa Tày, tame ấp 5, xã Thanh Hòa, huyện Bù Đốp padang mbang angui haong dua palak tangin saoh. Yaok harei sang sa-ai nao ngak pah duah jien diuk tapa harei, rai diuk mbang angui sang sa-ai gaok oh takik kan kandah. Meng di harei sang sa-ai hu Karja palei daong palaghaih, thun 2016 sang sa-ai Quân hu Gilang pariak Sarak karja brei mesre 50 triệu đồng; diuk pasang sa-ai mek phun jien nan nao blei kubao piah cak rok patagok kinh tế sang. Meng tari tareng, kham merat bac megru, urak ini sang sa-ai hu 7 drei kubao daok menek saong tapol pabe jaik 15 drei saong pala hu 5 ha pa-aok blait, ba jien tame ka sang sa-ai yaok thun labaih 200 triệu đồng, rai diuk grap tanat, brei ka 3 urang anek mbang bac yam tapa truh kan kathaot khang kajap …

Daok baoh sang Liêu Văn Kỳ, ndih tapui thun 1961 – bangsa Tày daok di ấp 5, xã Thanh Hòa; dom thun akaok mereip meng Cao Bằng tame Bù Đốp padang mbang angui bo kathot nyu ndam gam tui miat oh thau ngak habar yam tagok hu. Thun 2006 hu bruk sangka di Karja palei, sang sa-ai mesre hu phun jien di Gilang pariak sarak karja 45 triệu đồng, gam haong jien patak pataom hu di drei, sang sa-ai nao blei kubao mai raong. Urak ini sang sa-ai tapa truh kathaot khang kajap, hu 5 drei kubao menek saong 2,8 ha pa-aok blait daok paik baoh, yaok thun brei jien mek tame ka baoh sang sa-ai jaik 100 triệu đồng piah mbang huak yaok harei saong raong anek mbang bac, urak ini anek sa-ai Kỳ  daok ngak lin di huyện Bù Gia Mập tỉnh Bình Phước.

Tui ong Nguyễn Thanh Sơn, Akaok Tổ Patak pataom saong mesre phun jien ấp 5 xã Thanh Hòa brei thau: Hu bruk sangka di Đảng, Karja, Gilang pariak sarak karja Việt Nam jang yau Gilang pariak sarak karja huyện Bù Đốp hu palaghaih ka mikva mesre phun jien sarak karja. Ini lac jalan daong ka mikva ngak mbang yam tapa kan kathaot. Dom baoh sang mesre phun jien ngak mbang hu jak jeng, yaok bilan hu ba-yar veik jien laba, payua jien patak pataom bo sang nan duah hu piah hu jien laba ba-yar sre tuk tal harei ba-yar.

Tui taong yaom di Phaok akaok Gilang pariak sarak karja huyện Bù Đốp: Piah  daong pren ka dom baoh sang kathaot dalam huyện hu “Gai vah ikan” yam tapa truh kathaot khang kajap, duk giao dịch Gilang pariak sarak Karja huyện Bù Đốp daok peih ngak biak siam 13 danak dak brei mesre ưu đãi, tal urak ini phun jien brei mesre tagok tal labaih 260 tỷ đồng, rilo baoh sang urang bangsa takik yam tapa kathaot, padang hu sang danaok khang kajap, siam gheih, blei tame rilo janih pandap panda piah pandar dalam sang, raong ba anek mbang bac… tui nan bo baoh sang kathaot bangsa takik dalam huyện dak thun dak trun.

Piah ka dom sang kathaot jang yau sang kathaot bangsa takik, daok mesre hu phun jien di Gilang pariak sarak karja, pakat ủy Đảng, karja palei njauk patagok jang bruk pal akaok ba jalan, tacei pato dom bruk brei mesre phun jien sarak karja; tacei pato pambuak pagam jang dalam bruk buh jien tame danak dak brei mesre phun jien sarak karja ngan haong dom bruk ngak mbang pablei salih hu kein laba, laghaih haong jalan cak rok patagok kinh tế xã hội di puk palei. Dom kapul nyaom chính trị xã hội njauk pambuak bruk khang kajap jang haong Gilang pariak sarak karja dalam bruk pakhang, paglaong chất lượng bruk brei mesre phun jien sarak karja, pataom tame di dom xã kan kandah hu rilo urang bangsa takik daok, lac labik pambuak di karja saong bol bhap rahra rik daong tame bruk peih ngak danak dak patrun kathaot, ba bruk ngak, padang ngak palei pala bahrau, jhul patagok bruk ngak mbang kinh tế, khik kajap rai diuk mbang angui ka bol bhap rah ra daok di puk palei./.

Urang lang: Jasi -26/2 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân