GS.TS Lê Thị Quỳnh Mai, Phó akaok Viện vệ sinh dịch tễ T.Ư

 

Pambuak tal bruk mehit lac virus SARS-CoV-2 njom mbak tapa pandap mbang, GS.TS Lê Thị Quỳnh Mai, Phó akaok Viện vệ sinh dịch tễ Trung ương brei thau, virus SARS-CoV-2 njom mbak tabiak meng manuac ini tapa manuac diah tapa taom gaok jaik saong tapa ia pambah. Dreih yau dom virus Corona karei, virus SARS-CoV-2 meda diuk hu di dom pandap karei, grauk labik meng dom mong tal dua klau harei. Urak ini, oh ka thau virut ini meda diuk suai  yau halei di pandap mbang saong oh ka thau virus SARS-CoV-2 meda njom mbak tapa pandap mbang atau pandap papaok.

Tui panuac khan meng Cty CP Vaccine Việt Nam, lô Vaccine COVID-19 camriep di AstraZeneca hu mai tal ban raya Hồ Chí Minh harei broi. Ni lac Vaccine COVID-19 camriep di abih hu harak adat brei pandar di Việt Nam. AstraZeneca tui kuhria pabak 30 triệu mbang Vaccine ka Việt Nam. Vaccine COVID-19tuk mai tal Việt Nam  hu ba tame khik di 3 bilik biak laar, meng âm -40 tal âm 86 độ C, caik di Hà Nội, ban raya Hồ Chí Minh saong Đà Nẵng.

UB bhap bini Ban raya HCM brei anek saih, sinh viên saong urang bac di dom labik pato mereu saong pato bruk ngak nao bac gilac veik meng harei 1/3. Tui nan, Sở Pato megru, Sở LĐ-Thương binh saong Xã hội brei pambuak saong Sở Y tế brei tabiak dom sarak tacei pato labik pato megru  peih ngak catang saong ginup dom jalan pacang caga jit Covid-19 piah raok anek saih gilac veik tame sang bac adit anak. Taong abih anek saih, sinh viên, urang bac mai meng bhum jit atau hu nao tapa bhum jit brei thau gah y tế di palei piah tui iek saong dut iek prein yawa tui tacei pato di Pasak Pasang iek jit ruak Ban raya. Dom urang khan brei thau suan oh njauk atau oh ngak tui bruk brei pa-atah di gauk tui y tế njauk brei langyah catang tui adat hukum.

Melam 24/2, Công an quận Tân Phú (ban raya HCM) brei thau lac cap khik hu sa urang peih radaih mac pajeng gauk blah mek kadung teik blaoh ba tal bala di jalan ngak ka manuac nao di jalan metai. Bruk ni rahtabiak di melam 19/2 di labik 580 jalan Lê Trọng Tấn, quận Tân Phú, dua urang dam pajeng gauk di sruh radaih mac handoh mek kadung teik di dua gu likei kumei daok padeih radaih blei ia cea tasau. Hadei di tuk meblah mek drap ar, kol nyu peih radaih nduac biak samar, blaoh radaih di 2 kol blah ginuh tame radaih kayua saa Trần Văn Trí (ndik tapui thun 1989, daok di tỉnh Thừa Thiên Huế) nduac sa jalan. Bala ni ngak ka ja blah daok la gah likuk radaih metai chip, saai Trí njauk rambuac trak saong metai hadei di 3 harei tame sang iek ruak. Ja blah metai lac Bùi Minh Tuấn (umo 25 thun, daok di Quận 11). Urak ni jabat chức năng daok cap khik saong sua tangi ja blah bahrau cap khik.

Di Ninh Thuận, yaom rilo janih kaya ikan dalam ia di dom darak ikan, tapen kaya ikan tagok meng 10 tal 15% min oh ginup pablei kayua bhap bini blei rilo, tuai dulich mai rivang tagok. Jabat chức năng tỉnh daok pathau khan, pachreih baoh sang urang pablei salih njuak khik yaom, pablei njauk yaom.

Tổng thống Mỹ Joe Biden meda mbaoh tangin tame 1 harak adat di dalam bilan 2 ni. Dalam nan ieu kakei padang ngak sa chuỗi pabak công nghệ bahrau 'oh hu Trung Quốc' meng jalan pambuak haong rilo negar karei. Hãng tin Reuters brei thau jalan ngak di Tổng thống Biden rilo meng lac meda hu Quốc hội Mỹ pabak tame prein khang. 

Urang ngak praong di Đức saong Bỉ chap mek 23 tấn cocaine dalam mbang chap mek kol pablei matuy ngan saong pandap praong abih di châu Âu. Tui Hãng tin AFP, dah page harei 24-2, sa công ty blei tame di Rotterdam umo 28 thun chap hu di Hà Lan kayua pambuak tal pandap panda suan hukum nan. Taong abih dom matuy praong hu yaom yaok tỉ euro nan daok pajeng ba nao tal sa labik di Hà Lan. Urang jakar brei thau oh ka tuk halei mboh cacaine chap khik sa mbang haong gauk di châu Âu praong yau nan.

Harei ni, urang jakar ngak praong di Indonesia brei thau takik di nyu 5 urang metai saong labaih 70 urang lahik hadei di tuk rahtabiak bala jaleih taneh di sa mỏ ameh di huyện Parigi Mountong tỉnh Trung Sulawesi di Indonesia bier harei 24/2. Hajan khang dalam rilo harei ngak brei jaleih taneh dalam sa jalan lubang di mỏ ameh. Kapul roh duah, daong manuac njauk bala hu duah mboh 5 urang metai, dalam tuk jabat nan taduan hu panuac khan lac hu 70 urang lahik, dalam nan hu ilo urang urang njauk haluh lam. Tui urang jakar nan, bruk duah, daong manuac njauk bala daok hu peih ngak./.

Urang lang: A.Nghiêm –Thu Thảo  25/2/2021 10:47:22

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân