Karei jang urang Cam Ahier saong Aval, urang Cam Islam tal umo tok diuk tok pasang, amaik ame gah likei brei duah kumei ka anek drei saong duah menuac ngak maha nao tapa sang gah kumei piah kuhria. Tuk hu gah kumei taduan panuac, dua gah ginum gauk harei Paklaoh Panuac. Harei Paklaoh Panuac hu ngak di sang gah kumei, piah brei thau bruk dua dam dara ini jeng taneng haong gauk, cang tal harei lakhah. Sang ong Haji Abdol Hamit daok di tỉnh Đồng Nai hu sa urang anek likei tok diuk. Dahlau di nan, diuk pasang ong blei rilo pandap yau: ameh, baoh njuk, khan me-om, ao atah cuk lakhah…Tui adat di urang Cam Islam di bhum Meraong negar, gah likei brei hu pandap ba brei gah kumei dahlau di tuk ngak lakhah.

Bruk njauk biai di abih dalam ndam lakhah di urang Cam Islam nan lac bilik lakhah saong khan ao di pangantin lakei, kumei. Dalam harei lakhah, pangantin kumei cuk ao tah Cam oh blah dua gah yau ao tah di urang Viet. Pangantin kumei cuk rilo ameh, hu prik, kaong takuai, kaong tangin, krah saong talei baoh ameh...Gai klauk mbuk oh lac pandap ngak mekre bo daok lac ngak adat tuk lakhah. Pangantin likei cuk ao kurong, ngui sarong, akaok tuak kapiah atau kak sal yau urang nao haji.

Lakhah di urang Cam Islam bhian ngak dalam 3 harei. Harei ka 3 lac harei haiy pangantin likei nao sang gah kumei piah Kabol. Ong Mach Dares Samael dok di  Ban raya HCM langyah ka bruk Kabol lakhah tui Hukum Islam: Dalam hukum nikah hu 5 paka nan lac yang kasa vali, yang ka dua likei, yang ka klau kumei, yangka pak cap kabol, urang saksi….

Hadei meng Kabol blaoh, pangantin likei hu ba tame padim haong pangintin kumei. Dahlau meng daok la padim, pangantin likei suak gai klauk mbuk tabiak, tangin tacei tame dhei di pangintin kumei, salih ka panuac ndom lac: Meng tuk ini adei lac diuk di sa-ai, saong diuk pasang menyai ndom brei thau pang gauk…”. Tuk nan, ong Imam pok panuac meroi, abih gauk pok tangin likau ka dua diuk pasang bahrau hu kajap kro, umo atah, ngak mbang hu kaya meda. Dua pangantin daok la tapen gauk dalam dom minit piah ka gauk gar, ayut sahabat brei panuac tadhau ayuh. Blaoh hadei di nan, tuai hu da-a payak lisei. Urang Cam Islam bhian payak lisei haong cari imo. Bruk njauk biai nan lac, lakhah di urang Cam Islam oh hu alak, mbia.

Harei ini, tui raidiuk birau, dom adat cambat oh daok lagaih dalam ndam lakhah hu mikva klaak meneing. Yau ye, bruk ndok sakawin, princhơ glaong oh daok, bo tui prein di gah likei, habar ka dua diuk pasang bahrau hu bui sambai, haniem phul. Muk Aminah daok di Quận 6, TPHCM brei thau: Harei lakhah lac harei bui di dua gah, njauk brei daong kagauk piah anek nyu hu jeng diuk jeng pasang…

Lakhah blaoh hu 3 harei, dua diuk pasang bahrau nao ravang gauk gar dua gah. Hadei di nan, tui sang, urang likei meda daok veik gah diuk, atau likau amaik ame gah diuk brei ba diuk mai daok sang drei, atau dua diuk pasang likau tabiak daok karei jeng hu./.

Urang lang: A.Nghiêm - 16/2/2021

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân