Jalan mbak puk palei hu tuh bê tông siam mekre 

Mai tal dom xã bhum bhap bini Chăm huyện Ninh Phước dalam dom harei akaok thun bahrau 2021, khol dahlak mboh bruk salih bahrau song patagok biak rilo di pak ni. Rai duik di mik va dak harei dak trei sir, siam mekre. Angaok mblang padai chreih chrai kaoh mek njam patam siam , ginup pablei ka drak pasar dalam song langiu tỉnh. Dom palei ngak meng kan jeng chreih chrai jang hong dom harak pambuak bruk pablei saong jeng lac piah pabak hatai khin ka tuai rivang main dalam tuk  tết.

Peih ngak sarak di Thủ tướng rajaei ka bruk jhul patagok kinh tế - xã hội, khik caga siam mekre bhum bhap bini Chăm dalam tuk vak bahrau, tukvak 2012-2015 song tal thun  2020, meng phun jien  Trung ương, tỉnh song puk palei, UBND huyện Ninh Phước hu buh jien tabiak dong ka rilo danak dak di dom bhum palei hu urang Cam daok.

Daok dom krong ribong, huyện Ninh Phước hu buh jien tabiak padang dom danak dak yau :Sông Biêu, Bàu Zôn,Tà Ranh, Lanh Ra; jalan ia pruh ribaong Tiêu, Hóc Rọ, takai kraong Lu 1, 2, atah jiak 5.000 m; pasiam ribaong pakat  II, III, atah labaih  68 km... pabak ka bruk ngak nong hu siam lagaih. Urak ni, mblang taneh ngak nong bhum urang Cam pala drak hu peih prong, mik va thau salih janih phun pala, athur raong, pandar hu siam rilo jalan ngak bahrau tame bruk ngak mbang, pabak pren khang ka bruk ngak nong dalam huyen tagok khang.

Gam haong nan, dom xã bhum urang Chăm huyện Ninh Phước hu peih ngak rilo bruk hu kein laba glong yau bruk “1 njauk, 5 trun” angaok phun padai  năng suất labaih 7 tấn sa ha sa vụ, laba hu rilo jang jaik 4 triệu đồng sa ha. Bruk pala padai pajaih di dom xã Phước Hậu, Phước Thái di taneh prong labaih 190 ha, laba hu rilo jang jaik 6 triệu đồng sa ha, dut song padai pablei salih. Pala ngak brah hacih di palei Hữu Đức (xã Phước Hữu) di taneh prong 40 ha, laba hu rilo jang labaih 7 triệu đồng/sa ha dut song ngak padai praong. Bhap bini Chăm xã An Hải pala bahrau 50 ha măng tây xanh hu brei harak angan VietGAP ba jien tame labaih  500 triệu đồng sa ha sa thun. 

Abih di nyu nan lac, dalam nan njauk ndom tal bruk mblang hamu prong  hu peih ngak iek di bhum bhap bini Chăm xã Phước Hậu ba mai kein laba kinh tế cambaih laih. Tal puac thun  2019, dalam huyện peih prong bruk ni ngan song 15 mblang hamu prong, abih tih lac 2.348 ha.

Gam hong patagok kinh tế, Bruk pachreih bac pachreih megru dak harei dak hu peih prong, dom bruk ilamu - xã hội hu rilo salih bahrau, anek saih nao bac tagok glong tapa yaok thun, rilo ilamu di urang Chăm hu sangka khik ramik song patagok.

Dom bruk ngak meng kan  di bhap bini Chăm hu karja sangka buh jien tame ngak, pasiam veik song patagok yau palei ngak lan am Bàu Trúc, palei menyim khan bai Mỹ Nghiệp,Chung Mỹ…Dom doanh nghiệp peih dom tour rivang main  dalam song langiu tỉnh hu caik hatai sangka, pambuak song bruk rivang main palei ngak…,tapa nan hu yaih khan pandap di palei ngak tal tuia damuai, ba bruk ngak, paglaong jien mek tame ka urang ngak dalam palei, meng nan khik ramik song patagok ilamu bangsa Chăm di Ninh Phước tui jalan khang kajap.

Meng kham merat song meng bruk ngak hu, di bilan 10 thun 2020, Thủ tướng rajaei hu tabiak sarak brei angan huyện Ninh Phước mek hu tanut  palei pala bahrau thun 2019. Ni lac huyện palei pala bahrau camereip abih di tỉnh Ninh Thuận./.

Urang lang: Hanipha- 1/3

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân